तांदूळ घोटाळ्यात बडे मासे अडकणार? फडणवीसांनी केंद्राकडे पाठविले कागदपत्रे

नागपूर : रेशनवरील तांदूळ घोटाळा प्रकरणात (ration rice scam case) अनेक बडे मासे अडकण्याची शक्यता आहे. याप्रकरणी नागपूर रेशन दुकानदार संघटनेच्या अध्यक्षांनी विरोधीपक्ष नेते देवेंद्र फडणवीस (opposition leader Devendra Fadnavis) यांची भेट घेतलीय. या घोटाळ्याची सीबीआय चौकशी करण्यात यावी, अशी मागणी यावेळी करण्यात आली. त्यानंतर फडणवीस यांनी या घोटाळ्याचे कागदपत्रे केंद्राकडे पाठविल्याचे बोलले जात असून येत्या काळात भाजप तांदूळ घोटाळ्याचा मुद्दा लावून धरण्याची शक्यता आहे.

पंतप्रधान गरीब कल्याण योजनेतील तांदूळ घोटाळ्याची मोठी व्याप्ती आहे. प्रधानमंत्री गरीब कल्याण योजनेअंतर्गत लाभार्थ्यांना दिला जाणारा तांदूळ निकृष्ट दर्जाचा दिला जातोय. तसेच रेशन दुकांनमध्ये येणारा तांदळाचं वजन कमी असते. मोठ्या प्रमाणात तांदूळ बाहेर विकला जातो. हा प्रकार अधिकारी आणि राईस मिल मालकांचे संगनमताने होतो. त्यामुळे याच रेशनवरील तांदूळ घोटाळ्याबाबत नागपूर रेशन दुकानदार संघटनेचे अध्यक्ष गुड्डू अग्रवाल यांनी देवेंद्र फडणवीस यांची भेट घेतलीय.

दरम्यान, देवेंद्र फडणवीस यांनी देखील पूर्व विदर्भातील भंडारा, गोंदिया, चंद्रपूर जिल्ह्यापर्यंत तांदूळ घोटाळ्याची व्याप्ती मोठी असल्याचे म्हटले होते. त्याचे धागेदोरे वरपर्यंत असल्याचा आरोपही त्यांनी केला होता. आता रेशन दुकानदार संघटनेने फडणवीसांची भेट घेतली. त्यानंतर देवेंद्र फडणवीस यांनी या घोटाळ्याचे कागदपत्रे केंद्राकडे पाठविल्याचे बोलले जात आहे. याप्रकरणाची चौकशी झाल्यास मोठे मासे यात अडकण्याची शक्यता आहे.