काँग्रेसमध्ये वाद; बैठकीत वंजारी-हजारे समर्थक भिडले

नागपूर : महापालिका निवडणुकीपूर्वीच काँग्रेसमध्ये वादाला सुरुवात झाली आहे. रविवारी आमदार तसेच नवनियुक्त प्रदेश महासचिव अभिजित वंजारी यांना कार्यकर्त्यांच्या रोषाचा सामना करावा लागला. भाषण सुरू असतानाच पुरुषोत्तम हजारे यांनी वंजारी यांच्यासमोरील माइक फेकला तर त्यांच्या समर्थकांनी प्रचंड गोंधळ घालून सभा उधळून लावली.

महापालिका निवडणुकीच्या तयारीअंतर्गत रविवारी रात्री पारडी येथे लॉनमध्ये ब्लॉक क्रमांक दोनच्या कार्यकर्त्यांची बैठक बोलावण्यात आली होती. ब्लॉक अध्यक्ष युवराज वैद्य यांनी ही बैठक बोलावली होती. बैठकीत अभिजित वंजारी यांचे भाषण सुरू असतानाच पुरुषोत्तम हजारे समर्थकांसह तेथे दाखल झाले. आम्हाला बैठकीला का बोलावण्यात आले नाही असा सवाल त्यांनी उपस्थित केला.

नंतर हजारे समर्थकांनी गोंधळ घालण्यास सुरुवात केली. माइक फेकला, टेबल व खुर्च्या फेकल्या. त्यामुळे बैठकच गुंडाळावी लागली. विशेष म्हणजे विधानसभेच्या निवडणुकीत हजारे काँग्रेसचे उमेदवार होते. ते नगरसेवकसुद्धा आहेत. माजी मंत्री सतीश चतुर्वेदी यांचे ते कट्टर समर्थक आहेत.

आपणास व आपल्या समर्थकांना मुद्दामच बैठकीला बोलावले नव्हते. ज्या ठिकाणी बैठक घेण्यात आली जवळच आपले घर आहे. याच परिसराचा मी नगरसेवक आहो. काँग्रेसच्या बैठकीचे निमंत्रण नाकारून आपला अपमान करण्यात आला. हा विषय पक्षाच्या मंचावर नेण्यात येईल, असे पुरुषोत्तम हजारे यांचे म्हणणे आहे. बैठकीचे आयोजक युवराज वैद्य यांनी हजारे संघटनेचे पदाधिकारी नसल्याने त्यांना बोलावले नव्हते असे सांगितले.