Crime News : पित्यानेच रचला मुलाच्या अपहरणाचा कट

नागपूर : दारूड्या पित्याने आपल्या ७ वर्षाच्या मुलाला मैत्रिणीसोबत पाठविले. मात्र, बरेच तास उलटल्यानंतर ती मुलाला घेऊन आली नाही. पित्याने अपहरणाचा कांगावा करीत तक्रार नोंदविली. मात्र, पोलिसांनी सखोल चौकशी करीत सीसीटीव्ही फुटेजच्या माध्यमातून सर्व प्रकार उघडकीस आणत पित्याचा हा बनाव समोर आणला. बेलतरोडी पोलिस ठाण्याच्या हद्दीत राहणारा आकाश वाघोडे हा बांधकाम मजूर असून दारूडा आहे. दारू पिण्यावरून घरात वाद होत असल्यामुळे त्याची पत्नी ७ वर्षीय मुलाला घेऊन माहेरी गेली. तेव्हापासून जास्त दारू पित होता. त्याच्याच बांधकामावर मजूर असलेल्या ३५ वर्षीय महिलेशी त्याचे सूत जुळले. पत्नी सोडून गेल्यामुळे एकटा राहणाऱ्या आकाशच्या घरी ती नेहमी येत होती. तिलाही दारूचे व्यसन आहे. दोघेही नेहमी दारू पिऊन एकाच घरात राहत होते.

मंगळवारी आकाशने त्याच्या ७ वर्षीय मुलाला घरी आणले होते. त्याच रात्री त्याची मैत्रीणसुद्धा घरी आली. दोघांनीही रात्रीच्या सुमारास दारू प्यायली. सकाळी उठून मैत्रीण आकाशने सांगितल्याप्रमाणे मुलासह माहेरी छिंदवाडा-मध्यप्रदेश निघून गेली. ती सायंकाळी परत येणार होती. परंतु, न आल्यामुळे आकाशने मुलाचे अपहरण मैत्रिणीने केल्याची तक्रार बेलतरोडी पोलिस ठाण्यात दिली. त्यामुळे बेलतरोडीचे ठाणेदार चंद्रकांत यादव, एएचटीयूच्या प्रमुख रेखा संकपाळ यांचे पथक महिलेचा शोध घेत होते.

रेल्वेस्थानक आणि बसस्थानक परिसरातील सीसीटीव्ही फुटेज तपासण्यात आले. त्यात ती महिला मुलाला घेऊन बसमध्ये चढताना दिसत होती. बुधवारी ती मुलाला घेऊन नागपुरात आली. शताब्दी चौकातून जात असताना पोलिस उपायुक्त विजयकांत सागर यांच्या पथकाला ती महिला आणि मुलगा दिसला. तिला ताब्यात घेऊन बेलतरोडी पोलिस ठाण्याच्या ताब्यात दिले. ही कारवाई पोलिस उपायुक्त मुमक्का सुदर्शन, विजयकांत सागर, पोलिस निरीक्षक ज्ञानेश्वर भेदोडकर, एएचटीयूच्या सहायक पोलिस निरीक्षक रेखा संकपाळ, महेंद्र पाटील, राजेंद्र अटकाळे, नंदकिशोर तायडे, मनीष पराये, गोपाल देशमुख, ज्ञानेश्वर, हेमंत पराते यांनी केली.