Nagpur Fraud News : 'फिटजी’ने पालकांना लावला ७७ लाखांचा चुना; संचालकविरोधात फसवणुकीचा गुन्हा दाखल

नागपूर - देशभरात विविध शाखांना कुलुप लावून पसार झालेल्या फिटजी कोचिंग क्लासेसने पुन्हा एकदा नागपुरातील दीडशेहुन पालकांना कोट्यवधींनी फसवणूक केल्याची माहिती काही महिन्यापूर्वी समोर आली असताना, आता नंदनवन शाखेतील ५९ पालकांना ७७ लाख रुपयांनी गंडविल्याची धक्कादायक माहिती समोर आली आहे. याप्रकरणी कोतवाली पोलिसांना दिलेल्या तक्रारीवरून फिटजीच्या संचालकविरोधात फसवणुक आणि विविध कलमांसह गुन्हा दाखल केला आहे.

डी.के. गोयल (रा. कालुसराई, बिहार) असे गुन्हा दाखल झालेल्या आरोपी संचालकाचे नाव आहे. पोलिसांनी दिलेल्या माहितीनुसार, एप्रिल महिन्यात जवळपास शंभरावर पालकांनी ‘जेईई’साठी प्रवेश घेतला. त्यासाठी प्रत्येकी विद्यार्थी दीड, दोन आणि अडीच लाख रुपये शुल्क आकारण्यात आले होते.

साधारणतः डिसेंबरपर्यंत पालकांनी सर्वच शुल्क भरले होते. जून महिन्यात सिव्हील लाईन्स आणि इतर काही ब्रॅन्चमध्ये विद्यार्थ्यांचे क्लासेल बंद करण्यात आल्याने खळबळ उडाली होती. त्यावेळी येथील संचालक प्रणव शर्मा यांनी सावरासावर करून पालक आणि विद्यार्थ्यांना नंदनवन शाखा बंद होणार नाही असे आश्‍वासन दिले होते. त्यावेळीही पालकांनी त्यांना विचारणा केली होती.

मात्र, डिसेंबर महिन्यापर्यंत त्यांच्याकडून शुल्कापोटी ७६ लाख ७५ हजार ६५५ रुपये घेतले. मात्र, १ जानेवारीला विद्यार्थ्यांना शाखेला कुलुप लावण्यात आल्याचे दिसून आले. त्यामुळे पालकांनी संचालकांना विचारणा केली. मात्र, त्याबाबत कुणीच उत्तरे देण्यास तयार नसल्याची बाब समोर आली. अनेकदा त्यांना लवकरच शाखा पुर्ववत सुरू होईल असेही सांगण्यात आले.

मात्र, त्याबाबत काहीही न झाल्याने शेवटी पंधरा दिवसाआधी ५९ पालकांनी कोतवाली पोलिसांकडे तक्रार नोंदविली. त्या तक्रारीची चौकशी केल्यावर सोमवारी गुन्हा दाखल करण्यात आला. पोलिस आरोपीचा शोध घेत आहेत.

देशभरात फसवणुक

फिटजीच्या माध्यमातून देशभरातील क्लासेसच्या शाखांमध्ये हाच प्रकार सुरू असून अनेक शाखा बंद करण्यात आलेल्या आहेत. त्यामुळे पालकांची मोठ्या प्रमाणात फसवणूक झाल्याचे दिसून आले होते. त्यातून पालकांनी आंदोलनास सुरुवात केली. दरम्यान नागपुरातही असेच घडल्याने पालकांनी आंदोलन केले होते.