आता विदेशी विद्यार्थ्यांनाही देता येणार 'ऑनलाइन पेट', २४ एप्रिलपर्यंत करता येईल नोंदणी

नागपूर : राष्ट्रसंत तुकडोजी महाराज नागपूर विद्यापीठाद्वारे पीएच.डी.अभ्यासक्रमाच्या प्रवेशासाठी घेण्यात येणाऱ्या 'प्रवेश पूर्व परीक्षा'चे (पेट) १० ते १५ मेदरम्यान आयोजन करण्यात आले आहे. यासाठी २४ एप्रिलपर्यंत नोंदणी करावयाची आहे. मात्र, अनेक विदेशी विद्यार्थ्यांना विद्यापीठाकडे पीएच.डी करण्याची इच्छा असल्याने त्यांच्यासाठी विद्यापीठाद्वारे 'ऑनलाइन पेट' देण्याची सोय उपलब्ध करून देण्याचा निर्णय घेण्यात आला आहे. 

हेही वाचा - तब्बल सात हजार स्कूल व्हॅनची चाके थांबली; १३ महिन्यांपासून बेरोजगार; कुटुंबीयांवर उपासमारीची वेळ

विद्यापीठातील पाली व प्राकृत अभ्यासक्रम करण्यासाठी बौद्ध अनुयायी देशातील विद्यार्थी मोठ्या संख्येने येत असतात. त्यात दुबई, म्यानमार, भुटानसाख्या देशातील विद्यार्थ्यांनी विद्यापीठाकडे पीएच.डी. करण्याची इच्छा व्यक्त केली. मात्र, विद्यापीठाद्वारे पीएच.डी. अभ्यासक्रमात प्रवेशासाठी 'पेट' देणे आवश्यक आहे. त्यामुळे या विद्यार्थ्यांना विद्यापीठाद्वारे 'ऑनलाइन पेट' देण्याची सोय करून देण्याचा निर्णय विद्यापीठाने घेतला आहे. याबाबत विद्यापीठाचे कुलगुरू डॉ. सुभाष चौधरी यांचेशी संपर्क केला असता, त्यांनी याबाबत निर्णय घेतल्याचे सांगितले. याशिवाय महाराष्ट्राबाहेरील विद्यार्थ्यांसाठीही अशी सोय उपलब्ध करून देण्यावर विचार सुरू असल्याचे सांगितले. 

हेही वाचा - कोणी रेमडिसिव्हिर देता का? नातेवाईकांची भटकंती, तर बाधित डॉक्टरांचेही हाल

२,२३० विद्यार्थ्यांची नोंदणी -
विद्यापीठाद्वारे १ एप्रिलपासून सुरू करण्यात आलेल्या पीएच.डी.च्या ऑनलाइन नोंदणीत बुधवारपर्यंत २ हजार २३० विद्यार्थ्यांनी नोंदणी केली आहे. विद्यार्थ्यांना २४ एप्रिलपर्यंत https://nagpur.university/PHDPortal नोंदणी करता येणार आहे. यापैकी ७२० विद्यार्थ्यांनी शुल्क भरले असून इतरांनी आपला अर्ज निश्चित केला आहे. 

'पेट'साठी महत्त्वाचे - 

• पदव्युत्तर अभ्यासक्रमात ५५ टक्के गुण (प्रवर्गासाठी ५० टक्के) 
• नेट-सेट, एम.फील ला 'पेट'ची आवश्यकता नाही 
• १०० गुणांची परीक्षा 
• परीक्षा दोन भागात होणार (पहिला भाग रिसर्च मेथॉडॉलॉजी, दुसरा जनरल अ‌ॅप्टिट्यूड) 
• दोन्ही भागावर ५०-५० प्रश्न (प्रत्येकी १ गुण) 
• वेळ ९० मिनीट 
• इंग्रजी, हिंदी, मराठीमध्ये देता येणार परीक्षा 
• दोन्ही भागात ४० टक्के व संयुक्तरित्या ५० टक्के गुण आवश्यक