नागपूर : जमिनीच्या नावावर अडीच कोटींची फसवणूक

नागपूर : अजनी येथील दोन एकर जमिनीची परस्पर विक्री करीत, अडीच कोटीची फसवणूक केल्याप्रकरणी बजाजनगर पोलिस ठाण्यात दोघांविरुद्ध गुन्हा दाखल केला आहे. मो. आरीफ अब्दुल शखुर (वय ६७ रा. जाफरनगर) आणि परिक्षित अलबर्ट (वय ५०, रा. केटीनगर, काटोल रोड) असी आरोंपींची नावे आहेत.

पोलिसांनी दिलेल्या माहितीनुसार दिनदयाल देशराज यांच्या नावाने अजनी परिसरात दोन एकर जमीन आहे. त्‍यांच्या मृत्यूनंतर त्यांच्या पत्नी आणि पाच मुली यांच्या नावावर ती करण्यात आली. यानंतर या जमीनीवर फ्लॅट स्कीम आणि दुकानांसाठी खोल्या काढण्याच्या उद्देशाने २००० साली वारसदारांनी बीजे कन्स्ट्रक्शनचे भास्कर रासेकर यांनी ही जमीन मो. आरीफ अब्दुल शखुर आणि प्रतिभा अलबर्ट यांच्यासोबत करारपत्र केले.

त्याबदल्यात प्रतिभा अलबर्ट यांनी रासेकर यांना २ कोटी ७४ लाख रुपये दिले. मात्र, मो. आरीफ अब्दुल शखुर आणि प्रतिभा यांनी करार मोडून २ कोटी ५ लाख ३० हजार ९० रुपयात जमिनीचे अधिकार प्रसिद्ध बिल्डर एन. कुमार यांना विकले. याशिवाय प्रतिभा अलबर्ट यांचा मुलगा परिक्षित यालाही विकले. विशेष म्हणजे, याबाबत कुठलीही माहिती त्यांच्या वारसदारांना देण्यात आली नव्हती.

दरम्यान याबाबत माहिती घेतली असता ती जमिन एन. कुमार यांच्या नावाने असल्याचे आढळून आले. त्यामुळे वारसदारांनी याबाबत पोलिसांकडे तक्रार दाखल केली. त्यावरुन प्रकरणाचे गांभीर्य लक्षात घेता, आर्थिक गुन्हे शाखेद्वारे याचा तपास पोलिस निरीक्षक संतोष बकाल यांच्या नेतृत्त्वात करण्यात आली. त्यांनी केलेल्या तपासातून मो. आरीफ अब्दुल शखुर आणि परिक्षित अलबर्ट यांच्यावर बजाजनगर पोलिसांकडे गुन्हा दाखल केला असून पोलिस तपास करीत आहे.