Holi Festival 2023 : नागपूरकरांनो, होळी पेटवताना घ्या रस्त्यांची काळजी

नागपूर : अशुभ, अमंगल बाबी होळीच्या अग्नीत जाळून टाकायच्या आणि चांगल्या, शुभ गोष्टींचा स्वीकार करायचा, असा संदेश होळी सण देतो. मात्र शहरात डांबरी रस्त्यांवर होळी दहन करण्यात येत असल्याने यातून निघणाऱ्या उष्णतेमुळे रस्त्यांना फटका बसत असल्याचे चित्र पाहायला मिळते. त्यामुळे, यंदा होळी साजरी करताना या गोष्टीची काळजी घ्यायला हवी.

लॉकडाऊन हटविल्यानंतर शहरातील विकासकामांना गती आली. यात प्रामुख्याने रस्त्यांची कामे मोठ्या प्रमाणात झालेली दिसतात. गेल्या वर्षी मार्च महिन्यामध्ये होळी सणाला नागरिकांनी याच रस्त्यांवर होळी पेटविल्याने प्रत्येक वस्तीमधील डांबरी रस्त्यांचे नुकसान झालेले दिसते.

त्यामुळे, यंदा होलीका दहन करताना सार्वजनिक मालमत्तेचे विद्रुपीकरण होऊ नये, याची काळजी आपल्याला घ्यायची आहे. आज वस्त्या-वस्त्यांमध्ये होळी दहन करण्याचे प्रमाण वाढले आहे, नागरिक या निमित्त एकत्रित येत असल्याने ही बाब स्तुत्य जरी असली तरी साधारण २५ चौरस फूट डांबराचे यामुळे नुकसान होते.

एक चौरस फूट डांबरी रस्ता बांधायचा झाल्यास यासाठी ३६ रुपयांचा खर्च येतो. प्रशासनाच्या गेल्या वर्षीच्या आकडेवारीनुसार शहरामध्ये १७ हजारांच्या जवळपास होळींचे दहन केले जाते. त्यानुसार, सुमारे १. ५३ कोटी रुपयांचे नुकसान दरवर्षी महापालिकेला होते आहे.

गल्लो-गल्ली होळी पेटवताना महापालिकेकडून त्याची परवानगी घेतली जात नाही. यामुळे, असे प्रकार पुढे येत नाही. याबाबत जनजागृती करून पैशांचा अपव्यय, नुकसान टाळायला हवे.

-मनोज तालेवार, कार्यकारी अभियंता, नागपूर महापालिका

दोन दोन कुटुंब मिळून होळी दहन करण्याचे प्रमाण वाढल्याने होळी दहनाची संख्या वाढली आहे. याऐवजी दहा घरे मिळून एक होळी दहन केल्यास असे प्रकार, नुकसान टाळता येईल. शिवाय, वायू प्रदूषण देखील कमी होईल. परंपरेच्या नावाने अशा गोष्टींकडे दुर्लक्ष केले जाते. सार्वजनिक स्वरूपात सण साजरा केल्यास लोकांमध्ये बंधुभावही वाढेल.

-कौस्तव चॅटर्जी, पर्यावरण प्रेमी