Indian Defense Force : भारतीय संरक्षण दलात महिला राज ; एकूण ९ हजार ५८१ महिला सेवेत; नियम लिंगभेद विरहित

नागपूर - संरक्षण मंत्रालयातर्फे नुकत्याच प्रसिद्ध करण्यात आलेल्या आकडेवारीनुसार लष्कर, वायूदल, नौदल आणि सशस्त्र दल वैद्यकीय सेवेत महिला राज असल्याचे अधोरेखित झाले आहे. आज हा आकडा ९ हजार ५८१ पर्यंत पोहोचला आहे.

यापैकी नर्सिंग सेवेत सर्वाधिक ३ हजार ८४१ महिला आहेत. तर, त्या पाठोपाठ लष्करात १ हजार ७३३, वायूदल १ हजार ६५४, वैद्यकीय तुकडी १ हजार २१२ महिलांचा क्रमांक लागतो. सशस्त्र दलांमध्ये, कोणत्याही दलात अथवा सेवांमध्ये पुरुष-महिला अधिकाऱ्यांच्या कामकाजात भेदभाव केला जात नाही, असे संरक्षण मंत्रालयातर्फे स्पष्ट करण्यात आले आहे.

सैन्याच्या आवश्यकतेनुसार या महिला अधिकाऱ्यांना नियुक्त करण्यात येते. प्रशिक्षण, पोस्टिंग, पदोन्नती, प्रतिबद्धतेच्या अटी इत्यादी महिला आणि पुरुष दोघांसाठी समान आहेत.

भारतीय सशस्त्र दलातील रोजगारासंबंधीचे नियम लिंगभेद विरहित असून स्त्री आणि पुरुषांना समान संधी दिली जाते, असेही यामध्ये नमूद करण्यात आले. त्यामुळे, तिन्ही दलासह वैद्यकीय आणि प्रशासन अशा प्रत्येक विभागांत महिला हिमतीने काम करीत असून महिलांसाठी ही अभिमानाची बाब आहे.