तीन दिवसांपासून कॅज्युअल्टीच्या कोपऱ्यात पडलीये महिला; ना कोणी विचारत ना आजाराचे निदान

नागपूर : शासकीय वैद्यकीय महाविद्यालय व रुग्णालयात (मेडिकल) गैर कोरोना रुग्णांवर योग्यरित्या उपचार होत नसल्यामुळे त्यांचा जीव टांगणीला आला आहे. मागील तीन दिवसांपासून कॅज्युल्टीत महिला आहे. परंतु, तिला वॉर्डात हलवले नाही. केवळ ऑक्सिजन मास्क लावून तिला कोपऱ्यात ठेवले आहे.

गीताबाई पवनकर असे या महिलेचे नाव आहे. मेडिकलमध्ये ८ एप्रिलरोजी कॅज्युल्टीत आणले. तेव्हापासून तर आजपर्यंत कॅज्युल्टीतच तिला ठेवण्यात आले आहे. केवळ ऑक्सिजन माक्स लावून तिला तेथेच ठेवण्यात आले. मात्र, या महिलेला होणाऱ्या आजाराचे निदानही करण्यात आले नाही. कोणत्या चाचण्या करावयाच्या यासंदर्भात कोणतीही भूमिका डॉक्टरांनी घेतली नाही. यामुळे कोरोनाबाधित रुग्णांच्या गर्दीत इतर आजाराच्या रुग्णांनी उपचारांशिवाय मरायचे का? असा सवाल नातेवाईक विचारत आहेत.