खापरखेडा वीज केंद्रातील घटना; दोन कर्मचाऱ्यांचा मृत्यू

खापरखेडा : खापरखेडा औष्णिक वीज केंद्रातील कोल यार्ड परिसरात कोल स्टॅकर मशिनचे वाकलेले बूम अचानक तुटून खाली पडल्याने त्याखाली दबून वीज केंद्रातील कर्मचारी व एका कंत्राटी कामगाराचा घटनास्थळीच मृत्यू झाला. ही घटना बुधवारी मध्यरात्रीनंतर दीडच्या सुमारास घडली. या अपघातानंतर कामगारांनी मशिनकडे दुर्लक्ष करणाऱ्या अधिकाऱ्यावर मनुष्यवधाचा गुन्हा दाखल करण्याची मागणी केली आहे.

मृत वीज कर्मचाऱ्यांचे नाव संतोष राजेश मेश्राम (वय २०, वंजारी भवन, कोराडी) तर प्रवीण नारायण शेंडे (वय ३२, जयभोलेनगर, खापरखेडा) असे कंत्राटी कामगाराचे नाव आहे. बुधवारी रात्री महाकाय कोल स्टॅकर मशिनवर संतोष मेश्राम हा चालक तर प्रवीण शेंडे हा सफाई कामगार म्हणून कार्यरत होता. अंदाजे दीड वाजताच्या सुमारास मशिनचे वाकलेले बूम अचानक खाली पडले. यात संतोष व प्रवीणचा जागीच मृत्यू झाला. घटनेची माहिती मुख्य अभियंता राजू घुगे यांच्यासह संबंधित अधिकारी व पोलिसांना देण्यात आली. संतोष मेश्राम व प्रवीण शेंडे या दोघांचेही मृतदेह मशिनखाली दबल्याने ते दुसऱ्या मशिनच्या मदतीने बाहेर काढण्याचा प्रयत्न करण्यात आला.

मात्र, प्रयत्न निष्फळ ठरले. अखेर ग्रँडर मशिनने स्ट्रॅकर मशिनचे भाग कापून दोन्ही मृतदेह बाहेर काढण्यात आले. घटनेची माहिती वीज कामगार तसेच कंत्राटी कामगार वर्गात वाऱ्यासारखी पसरली. ५०० मेगावॉट औष्णिक वीज केंद्राच्या मुख्य प्रवेशद्वारावर शेकडो वीज व कंत्राटी कामगार जमा झाले. कामगारांचा रोष बघून राखीव दलाची तुकडी बोलविण्यात आली. मृतांच्या कुटुंबीयांना नुकसानभरपाई देण्यात यावी आणि संबंधित दोषी अधिकाऱ्यावर कारवाई करण्याची मागणी कामगारांनी रेटून धरली. कारवाई होत नाही तोपर्यंत मृतदेह हलविणार नाही, असा पवित्रा कंत्राटी कामगार व स्थानिक राजकीय नेत्यांनी घेतला. त्यामुळे काही काळ तणावपूर्ण स्थिती निर्माण झाली होती.

चौकशी करणार : घुगे

यासंदर्भात मुख्य अभियंता राजू घुगे यांच्याशी संपर्क साधला असता त्यांनी कोळसा हाताळणी विभागात कार्यरत अतिरिक्त कार्यकारी अभियंता सुजय चव्हाण, उप-कार्यकारी अभियंता अजय दशसहस्र, तंत्रज्ञ सेवक डाखोळे यांना सक्तीच्या रजेवर पाठविण्यात आले असल्याचे सांगितले. तसेच या प्रकरणाची चौकशी करण्यात येणार असल्याचे त्यांनी स्पष्ट केले. खापरखेडा पोलिसांनी यासंदर्भात गुन्ह्याची नोंद केली असून पुढील तपास सुरू आहे.