Nagpur : आरटीओसोबत वाद घातल्यास तुरुंगवारी!

नागपूर - कारवाई टाळण्यासाठी आरटीओ अधिकाऱ्यांसोबत वाद घालणाऱ्या वाहन चालकांच्या आता अंगलट येणार आहे. कारण वाहकांनी आरटीओ अधिकाऱ्यांसोबत साधलेले सर्व संभाषण बॉडी वॉर्न कॅमेऱ्यात रेकॉर्ड होणार आहे. तेच अधिकाऱ्यांकडील सबळ पुरावा ठरणार आहे. त्यामुळे आता वाद घातल्यास वाहन चालकांना तुरुंगांत जावे लागू शकते. कारण आरटीओ अधिकाऱ्यांना लवकरच बॉडी वॉर्न कॅमेरे मिळणार आहेत.

नागपूर शहर आणि ग्रामीण रस्त्यावर प्रादेशिक परिवहन विभाग (आरटीओ)चे मोटार वाहन निरीक्षक आणि सहाय्यक मोटार वाहन निरीक्षकांकडून वाहन चालकांवर कारवाई करण्यात येते. बरेचदा वाहन चालक आणि अधिकाऱ्यांमध्ये कारवाईवरून वादावादी होते. कारवाई टाळण्यासाठी वाहन चालकांकडून दबाव टाकला जातो. आपल्याला ओळखत नाही का? किंवा मोठ्या व्यक्तीला फोन करण्याची धमकी देण्यात येते. त्यावरही अधिकारी मानले नाही तर त्यांच्याशी वाद घातला जातो.

आता हा सर्व वाद कॅमेऱ्यात रेकॉर्ड होणार आहे. त्यामुळे अधिकारी पुरावा म्हणून आपल्याकडे ठेवू शकतील. वाहन चालकांवर दंडासह आता पुराव्याच्या आधारे प्रसंगी कारागृहात सुद्धा जावे लागू शकते. त्यामुळे आरटीओच्या अधिकाऱ्यांशी वाद घालणे आता चांगलेच महागात पडू शकते.

नागपूर विभागात मिळणार ५५ कॅमेरे

राज्यातील सर्व प्रादेशिक परिवहन कार्यालयातील मोटार वाहन निरीक्षकांना बॉडी वॉर्न कॅमेरे देण्याचा निर्णय घेण्यात आला आहे. नागपूर जिल्ह्यात ३० मोटार वाहन निरीक्षक व २५ सहाय्यक मोटार वाहन निरीक्षक आहेत. त्यामुळे नागपूर विभागाला ५५ च्या जवळपास कॅमेरे मिळण्याची शक्यता वर्तविण्यात येत आहे.

दिवसभराचे होणार चित्रीकरण

नागपूर वाहतूक पोलिस विभाग, रेल्वे सुरक्षा बल या विभागातील पोलिसांजवळ बॉडी वॉर्न कॅमेरे आहेत. आता आरटीओ अधिकाऱ्यांनाही असे कॅमेरे मिळणार आहेत. पोलिस गणवेशातील हा कॅमेरा खांद्यावर किंवा खिशाजवळ लावण्यात येतो. कर्तव्यावर असणारे अधिकारी दिवसभरातील व्हिडीओ रेकॉर्डिंग करू शकतात. दहा तासांच्यावर रेकॉर्डिंग कॅमेऱ्यात साठविण्याची क्षमता आहे. अधिकारी आणि वाहन चालकांची सर्व बातचीत यात रेकॉर्ड होईल. हा पुरावा मानून कडक कारवाई करण्यात येईल.

कारवाई दरम्यान वाहन चालकांशी वाद होतात. वाहन निरीक्षकांना कॅमेरे मिळाल्यास चित्रीकरणातून त्याचा आधार मिळेल. हा आमच्यासाठी चांगलाच पुरावा राहील. त्यामुळे कारवाई करणे आणखी सुलभ व पुराव्यानिशी होईल.

-हर्षल डाके,

सहाय्यक प्रादेशिक परिवहन अधिकारी, नागपूर विभाग