Nagpur : नागपुरात ‘ॲस्ट्रो नाईट टुरिझम’चा श्रीगणेशा

नागपूर : केंद्र सरकारच्या संस्कृती मंत्रालयांतर्गत राष्ट्रीय विज्ञान संग्रहालय परिषदेच्या माध्यमातून सर्वसामान्य जनतेमध्ये खगोल विज्ञानाची आवड निर्माण व्हावी यासाठी भारतातील विविध शहरांत ‘ॲस्ट्रो नाईट टुरिझम’ या उपक्रमाची सुरवात केली आहे.

पर्यटनस्थळी आकाश दर्शनाचे कार्यक्रम होणार आहे. नागपूरमधील याची सुरवात रामन विज्ञान केंद्र आणि तारामंडळतर्फे बाळासाहेब ठाकरे गोरेवाडा आंतरराष्ट्रीय प्राणी उद्यानातून झाली.

बाळासाहेब ठाकरे गोरेवाडा आंतरराष्ट्रीय प्राणी उद्यान, रामन विज्ञान केंद्र आणि तारामंडळतर्फे गोरेवाडा प्राणिसंग्रहालय वाहनतळ येथे हौशी नागरिकांकरिता आकाश दर्शन कार्यक्रम आयोजित करण्यात आला. दोन हजाराहून अधिक विद्यार्थी आणि नागरिकांनी यात सहभाग घेतला. उपस्थितांना रामन विज्ञान केंद्र आणि तारामंडळ,

नागपूर येथील तज्ज्ञ चारुदत्त पुल्लीवार, महेंद्र वाघ आणि अभिमन्यू भेलावे यांनी मार्गदर्शन केले. एकूण सहा आकाश दुर्बिणीच्या सहाय्याने उपस्थितांनी चंद्रावरील खळे, मंगळ, शुक्र, ओरायन नेब्युला या खगोलांचा आस्वाद घेतला. केंद्रातर्फे सुमीत नासरे, तुषार मडके, हरिष देशपांडे, पुष्पम चौरासिया, कालिदास नाकाडे, पवन डोहाळे यांनी आकाश दुर्बीण सहायकाची भूमिका पार पाडली.

सामान्य नागरिकांमधील ग्रह, तारे, नक्षत्र याबद्दलचे गैरसमज दूर करून खगोल विज्ञानाबाबत वैज्ञानिक दृष्टिकोन निर्माण करणे हा या कार्यक्रमाचा उद्देश असल्याचे महेंद्र वाघ यांनी सांगितले. प्राणिसंग्रहालयाचे संचालक एस. एस. भागवत यांनी सहभागी नागरिक आणि विद्यार्थ्यांचे स्वागत करून कार्यक्रमाची सुरवात केली.