Nagpur : नागपूरकरांनी अनुभवली सर्वाधिक थंड रात्र

नागपूर : विदर्भातील थंडीच्या लाटेने उग्ररूप धारण केले असून, तापमानाने शुक्रवारी या वर्षातील नवा नीचांक नोंदवला गेला. नागपूरचा पारा या हिवाळ्यात प्रथमच दहाच्या खाली आला. नागपूरकरांसाठी गुरुवारची रात्र सर्वाधिक थंड होती. गोंदिया येथे लागोपाठ दुसऱ्या दिवशी सर्वात कमी तापमानाची नोंद करण्यात आली.

राजस्थानकडून येणाऱ्या कोरड्या वाऱ्यांमुळे सध्या मध्य भारतात थंडीची लाट पसरली आहे. लाटेचा सर्वाधिक प्रभाव महाराष्ट्र, मध्यप्रदेश व छत्तीसगडमध्ये जाणवत आहे. कडाक्याच्या थंडीने विदर्भालाही कवेत घेतले आहे. शुक्रवारीदेखील विदर्भातील सर्वच जिल्ह्यांमध्ये थंडीने कहर केला. गुरुवारच्या तुलनेत नागपूरचा पारा आणखी एका अंशाने घसरून यंदाच्या मोसमात प्रथमच दहाच्या खाली (९.९ अंशांवर) आला. गेल्या तीन दिवसांत नागपूरच्या किमान तापमानात तब्बल सात अंशांची घट झाली आहे.

नागपूरकरांनी अनुभवली सर्वाधिक थंड रात्र

गोंदियाचा पाराही दीड अंशाने घसरून ८.८ वर आला. येथे नोंद झालेले तापमान विदर्भात सर्वात कमी राज्यात दुसरे नीचांकी ठरले. इतरही जिल्ह्यांमध्ये थंडीचा कडाका जाणवत आहे. कमाल तापमानातही सतत घसरण होत आहे. गारठा व बोचऱ्या वाऱ्यांमुळे तरुणांसह सारेच त्रस्त आहेत. थंडीपासून बचावासाठी ऊनी कपडे व शेकोट्यांचा आधार घ्यावा लागत आहे. केवळ रात्रीच नव्हे, दिवसाही गारव्याचा त्रास होत आहे.

वादळी पावसाची शक्यता

बंगालच्या उपसागरात तयार झालेल्या चक्रीवादळामुळे शनिवारनंतर विदर्भात ढगांची दाटी होण्याची शक्यता आहे. त्यामुळे नागपूरसह अनेक जिल्ह्यांना वादळी पावसाचा तडाखा बसू शकतो. पाऊस व ढगाळ वातावरण दोन-तीन दिवस राहणार असल्याचे प्रादेशिक हवामान विभागातर्फे सांगण्यात आले.

विदर्भातील तापमान (अंश सेल्सिअसमध्ये)जिल्हा तापमान

• गोंदिया ८.८

• नागपूर ९.९

• यवतमाळ १०.५

• वर्धा ११.०

• बुलडाणा ११.०

• अकोला ११.३

• ब्रम्हपुरी ११.३

• अमरावती ११.४

• वर्धा १२.४

• चंद्रपूर १२.०

• गडचिरोली १२.४

• वाशीम १३.२