नागपूर : मृत्यूच्या दाढेतून मातेसह बाळाची सुटका! | Sakal
sakal

बोलून बातमी शोधा

Nagpur Doctor rescued Mother and baby from death

नागपूर : मृत्यूच्या दाढेतून मातेसह बाळाची सुटका!

नागपूर : बाळाचा जन्म हा आई आणि तिच्या कुटुंबीयांसाठी आनंदाचा क्षण असतो. बाळ सुखरूप जन्मल्यानंतर सगळ्यांच्या जिवात जीव येतो. मात्र, मेळघाटातील धारणी येथून मेडिकलमध्ये आलेल्या महिलेची स्थिती अत्यंत चिंताजनक होती. हिमोग्लोबिन अवघे साडेसहा एवढेच होते. प्रसूतीच्या वेदनाही सहन होत नव्हत्या. बाळासह मातेच्या जिवाची जोखीम क्षणोक्षणी वाढत होती. पण मेडिकलच्या स्त्री व प्रसूतीरोग विभागातील डॉक्टरांनी शर्थीचे प्रयत्न करीत तिच्यासह बाळाला जीवदान दिले. २४ तासांत सुखरूप प्रसूती झाली अन् मातेच्या कुशीत बाळ विसावले.

मेळघाटमधील धारणी तालुक्यातील सागरवाडी प्राथमिक आरोग्य केंद्रातून ललिता शिवकुमार दहिकर(वय २७)मेडिकलमध्ये रेफर केले. दोन मे रोजी सकाळी मेडिकलमध्ये आणले त्यावेळी तिचे हिमोग्लोबिन अवघे साडेसहावर आले होते तर २४ हजाराच्या घरात प्लेटलेट्स होत्या. यामुळे तिची शुद्ध हरवली होती. गर्भवती असताना आहारापासून वंचित राहिल्याने ती कुपोषित राहिली. गर्भातच बाळाचा जीव धोक्यात होता.

मृत्यूच्या दाढेतून मातेसह बाळाची सुटका!

मेडिकलच्या युनिट क्रमांक पाचमधील डॉक्टरांनी दोन रक्त युनिटसह प्लेटलेट्स वाढवण्यात काम काही तासांत केले. प्रसूतीसाठी ललिता सक्षम झाल्याचे दिसताच डॉक्टरांनी शस्त्रक्रिया केली. माता आणि गर्भातील बाळाचा जीव वाचविला. ते दोघेही २४ तासांपासून डॉक्टरांच्या निरीक्षणात आहेत. युनिट पाचचे प्रमुख डॉ.अनिल हुमणे यांच्यासह वैद्यकीय पथकाचे कौतुक अधिष्ठातांकडून कौतुक करण्यात आले.

मातेच्या कुशीत विसावले बाळ...

ललिताने एका गोंडस बाळाला जन्म दिला. तिचा जीव वाचवण्यासाठी डॉक्टर देवदूत म्हणून धावून आले. त्याचप्रमाणे मेडिकलमधील सामाजिक कार्यकर्त्या असलेल्या सुरेखा ताटेवार यांचे मोलाचे योगदान मिळाले. येथील स्त्री व प्रसूतीरोग विभागप्रमुख डॉ. जितेंद्र देशमुख यांनी रक्ताची गरज असल्याचे ताटेवार यांना सांगितले. सुरेखा ताटेवार यांनी कार्यालयात येण्यापूर्वीच घरूनच रक्त आणि प्लेटलेट्सची जुळवाजुळव केली. यामुळे डॉक्टरांना शस्त्रक्रिया करताना मदत झाली. ताटेवार यांच्याप्रमाणे मेडिकलचे जनसंपर्क अधिकारी डॉ. मुरारी सिंग यांचीही शस्त्रक्रियेसाठी मोलाची मदत मिळाली.

मेळघाटात मुख्यत्वे कुपोषणामुळे येथील मातांमध्ये रक्तक्षय दिसून येतो. जन्म देणारी माताच कुपोषित असल्याने जन्मलेले बाळ कुपोषित असते. मेडिकलमध्ये स्त्री व प्रसुतीरोग तसेच बालरोग विभागातील डॉक्टरांनी सामूहिक प्रयत्न केल्याने मातेसह चिमुकल्याचा जीव वाचला.

- डॉ. राज गजभिये, अधिष्ठाता, मेडिकल.

Web Title: Nagpur Doctor Rescued Mother And Baby From Death

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top