नागपूर : खोटी स्वाक्षरी करून फसवणूक

नागपूर - लॅन्ड डेव्हलपर्स कंपनीमध्ये भागीदार असलेल्या मित्राची खोटी स्वाक्षरी करून त्याच्याच मित्राने पत्नीच्या खात्यावर १२ लाख २७ हजार वळविल्याची माहिती समोर आली. फसवणूक करणाऱ्या दाम्पत्यावर मानकापूर पोलिसांनी फसवणुकीचा गुन्हा दाखल केला.

नवनीत ज्ञानेश्‍वर लांडगे (वय ४९, श्रीकृष्णनगर, झिंगाबाई टाकळी), देवयानी नवनीत लांडगे (वय ३८) अशी आरोपींची नावे आहेत. पोलिसांनी दिलेल्या माहितीनुसार, शिवकुमार रामचंद्र तिवारी (वय ६२, माता नगर, झिंगाबाई टाकळी) यांची श्रीराम लॅन्ड डेव्हलपर्स नावाने फर्म आहे. त्यात नवनीत यांची पत्नी देवयानी भागीदार आहे. या दोघांचेही श्रीराम को. ऑपरेटिव्ह बॅंकेच्या गोधनी येथील शाखेमध्ये ज्वॉईंट अकाउंट आहे.

त्यात प्लॉटच्या खरेदी विक्रीतून आलेल्या नफ्याची रक्कम जमा होते. विशेष म्हणजे याच बॅंकेत नवनीत लांडगे कॅशिअर आहेत. त्यामुळे येथेच त्यांनी खाते सुरू केले. दरम्यान नवनीत आणि देवयानी यांनी संगनमत करीत शिवकुमार तिवारी यांच्या खोट्या स्वाक्षरी केल्या. त्यातून ३१ धनादेशाच्या माध्यमातून ९ लाख ४८ हजार काढले. याशिवाय त्यांच्या संमतीविना १६ व्हाऊचरच्या माध्यमातून २ लाख ७९ हजार ४२६ रुपये असे एकूण १२ लाख २७ हजार ४२६ रुपये पत्नीच्या स्वतंत्र खात्यात वळते केले.

दोघांवरही गुन्हा नोंदविला

खात्यात पैसे नसल्याची माहिती समोर आली असता, त्यांनी बॅंकेत चौकशी केली. त्यावेळी त्यांच्या स्वाक्षरीनेच धनादेश वटविण्यात आल्याची माहिती समोर आली. याबाबत त्यांनी नवनीतला विचारणा केली. मात्र, त्याने कुठलेही उत्तर दिले नाही. त्यामुळे फसवणूक झाल्याचे कळताच, त्यांनी मानकापूर पोलिसांकडे तक्रार दाखल केली. यावेळी तक्रारीची चौकशी केल्यावर पोलिसांनी दोघांवरही गुन्हा नोंदविला आहे.