नागपूर : प्रियकराशी लग्नाचा हट्ट धरल्याने मुलीचा केला खून

वर्धा : मुलीने प्रियकराशी लग्न करण्याचा हट्ट धरल्याने राग अनावर झालेल्या बापाने लाकडी काठीने मारून तिचा खून केला. ही घटना सेलू तालुक्यातील हमदापूर येथे बुधवारी दुपारी १ वाजताच्या सुमारास घडली. या प्रकरणी आरोपी बापाला पोलिसांनी अटक केली. प्रणाली विलास ठाकरे (वय १८) असे मृत मुलीचे नाव आहे.

पोलिसांनी दिलेल्या माहितीनुसार, प्रणाली ही ऑक्टोबर २०२१ मध्ये मामाकडे पाहुणी म्हणून आली होती. दरम्यान, तिचे येथील एका युवकाशी सूत जुळले. दोघांनी प्रेमाच्या आणाभाका घेतल्या. लग्न करण्याचेही ठरवले. मात्र, याला कुटुंबीयांकडून विरोध होणार असल्याचे लक्षात आल्याने दोघांनी पळ काढला होता. याप्रकरणी मुलीच्या कुटुंबीयांनी फूस लावून पळवून नेल्याची तक्रार दिल्याने मुलाविरुद्ध अपहरणाचा गुन्हा नोंद करून त्याला अटक करण्यात आली होती. तर, मुलीला तिच्या कुटुंबीयाच्या स्वाधीन करण्यात आले होते. तेव्हापासून प्रणालीचे कुटुंबीयांशी पटत नव्हते. त्यांच्यात घरी नेहमी खटके उडायचे. दरम्यान, आज बुधवारी दुपारी याच कारणातून वडील आणि मुलीमध्ये वाद झाला.

मुलीने प्रियकराशी लग्न करण्याचा हट्ट धरल्याने चिडलेल्या बापाने लाकडी काठीने मुलीच्या डोक्यावर वार करत गंभीर जखमी केले. यात तिचा मृत्यू झाला. घटनेची माहिती मिळताच दहेगाव पोलिसांनी घटनास्थळी पोहोचून पंचनामा करत मृतदेह उत्तरीय तपासणीसाठी जिल्हा सामान्य रुग्णालय, वर्धा येथे पाठविला. घटनास्थळी अपर पोलिस अधीक्षक यशवंत सोळंकी, उपविभागीय पोलिस अधिकारी पीयूष जगताप यांनी भेट देत घटनेचा आढावा घेतला. याप्रकरणी आरोपी विलास ठाकरे याला पोलिसांनी अटक केली आहे. तपास दहेगाव पोलिस ठाणेदार योगेश कामाले करत आहे.