Nagpur : गुढीपाडवा, रामनवमीही झाली ‘आनंदाचा शिधा’ची ओंजळ खाली

नागपूर : दिवाळीप्रमाणेच गुढीपाडवा आणि डॉ. बाबासाहेब आंबेडकर जयंतीनिमित्त शिधापत्रिकाधारकांना ‘आनंदाचा शिधा’ देण्याचा निर्णय सरकारने घेतला आहे. पण गुढीपाडवा होऊन गेला. रामनवमीही झाली. तरिही आनंदाचा शिधा मिळालाच नाही. पुरवठादाराकडून अद्याप साहित्यच देण्यात न आल्याने लाभार्थी शिधाच्या आनंदापासून वंचित आहेत.

मुख्यमंत्री एकनाथ शिंदे यांच्या नेतृत्वाखालील शिवसेना-भाजप सरकारने गेल्या वर्षी दिवाळीत ‘आनंदाचा शिधा’ योजना राबवली होती. त्यावेळी अनेक भागांत दिवाळी संपल्यानंतर ‘आनंदाचा शिधा’ जनतेपर्यंत पोहोचला होता. त्यामुळे या योजनेवर विरोधकांकडून जोरदार टीका झाली. परंतु ही योजना यशस्वी झाल्याचा दावा करीत सरकारने यंदाही ‘आनंदाचा शिधा’ देण्याचा निर्णय घेतला.

त्यानुसार अंत्योदय अन्न योजना, प्राधान्य गटातील कार्डधारकांना १०० रुपयात एक किलो रवा, चनाडाळ, साखर आणि एक लिटर पामतेल देण्यात येणार आहे. पण गुढीपाडवा होऊन आज दहा दिवसाचा कालावधी लोटला. लाभार्थ्यांना मात्र शिधा मिळालाच नाही. पुरवठादाराने पूर्ण साहित्य दिले नाही. त्यामुळे अनेक दुकानात शिधाच पोहचली नाही.

पुरवठादारावर कारवाई नाही

गुढीपाडव्यालाच सर्व साहित्य दुकानात येणे अपेक्षित होते. परंतु पुरवठादाराने साहित्य दिले नाही. चार साहित्यापैकी काही साहित्य दिले असून काही साहित्य आलेच नाही. मागणी केल्यावरही त्यांच्याकडून तो होत नाही. त्यामुळे लाभार्थी वंचित आहे. परंतु अद्याप पुरवठादारावर कोणतीही कारवाई झाली नाही. त्यामुळे शासनाकडून पुरवठादाराला अभय देण्यात येत असल्याचे दिसते.

साखरेचा सर्वाधिक पुरवठा

पुरवठादाराला साखर, रवा, चनाडाळ व पामतेल द्यायचे आहे. परंतु त्यांच्याकडून सर्वाधिक सारख देण्यात आली. चनाडाळ गरजेच्या निम्म्याही दिली नाही. इतरही साहित्याची स्थिती तशीच आहे. हे साहित्य देण्यासाठी पिशवीही द्यायची आहे. परंतु या पिशव्यांचा २० टक्के पुरवठा झाला नाही.