नागपूर : बीबीएच्या विद्यार्थ्यांची आत्महत्या

नागपूर : एमआयडीसी पोलिस ठाण्याच्या हद्दीत असलेल्या हिंगणा येथील संत गाडगे नगरात राहणाऱ्या २३ वर्षीय युवकाने गळफास घेऊन आत्महत्या केली. ही घटना शनिवारी पावणेदहाच्या सुमारास घडली.

प्रथम दामोधर गरपल्लीवार असे विद्यार्थ्याचे नाव आहे. मुळचा चंद्रपूर येथील असलेला प्रथम रायसोनी महाविद्यालयातील बीबीए द्वितीय वर्षाचा विद्यार्थी आहे. परवा त्याने घरी सिलिंग फॅनला चादरीच्या सहाय्याने गळफास घेवून आत्महत्या केली. दरम्यान प्रथम न दिसल्याने घरमालकांनी दार ठोठावले. मात्र, प्रतिसाद न मिळाल्याने त्यानी दार तोडून आत प्रवेश केला.

त्यावेळी प्रथम लटकलेल्या अवस्थेत आढळला. त्यांनी याची सूचना एमआयडीसी पोलिसांना दिली. पोलिसांनी तपासणी केली असता, तिथे त्याने लिहिलेले पत्र आढळले. त्यात माझा मृत्यूला कुणीही जबाबदर नसल्याचे लिहिले आहे. मात्र, काही दिवसांपासून तणावात असल्याचे सांगण्यात येते. त्याने नेमकी कोणत्या कारणाने आत्महत्या केली ते कळू शकले नाही. याप्रकरणी स्नेहा रमेश मुकुंद (वय ३०) यांनी दिलेल्या सुचनेवरून पोलिसांनी अकस्मात मृत्युची नोंद केली आहे.