नागपूर : काम असेल तरच भेटायला येत चला...

नागपूर : ‘काही काम असेल तरच भेटायला येत चला. उगाच टाईमपास करू नका’ अशा शब्दात विरोधी पक्षनेते अजित पवार यांनी आज राष्ट्रवादीच्या कार्यकर्त्यांना फटकारले. कार्यकर्त्यांनी आपल्या प्रभागात लक्ष घालण्याचा सल्लाही त्यांनी यावेळी दिला. अजित पवार सध्या विदर्भाच्या दौऱ्यावर आहेत. चंद्रपूर आणि गडचिरोली जिल्ह्यातील पूरपरिस्थिती तसेच अतिवृष्टी झालेल्या गावांना भेटी देऊन परतल्यानंतर शुक्रवारी सकाळी सात ते साडेसात वाजताच्या दरम्यान त्यांना भेटायला पदाधिकारी व कार्यकर्ते रविभवन येथे गेले होते.

राष्ट्रवादी काँग्रेसचे शहराध्यक्ष दुनेश्वर पेठे यांनी पदाधिकारी व कार्यकर्त्यांना भेटायचे असल्याचे सांगून वेळ मागितली होती. सकाळी भेटायला आलेल्या कार्यकर्त्यांना दादांनी चांगलेच धारेवर धरले. उठसूठ नेत्यांच्या मागे फिरत जाऊ नका. त्यापेक्षा आपल्या प्रभागात लक्ष घाला.

नागरिकांच्या भेटीगाठी घ्या आणि महापालिकेच्या निवडणुकीच्या तयारीला लाग, अशा शब्दात सुनावले. नेत्यांच्या मागे लागून टाईमपास करीत जाऊ नका.महत्त्वाचे काम असेल तर जरुर भेटा, असेही त्यांनी सांगितले. अजित पवार यांचा खमक्या स्वभाव सर्वांनाच ठाऊक आहे. रिकामटेकड्यांना ते समोर उभेही करीत नाहीत. हे माहिती असतानाही अनेक कार्यकर्ते त्यांना भेटायला गेले होते. भेटीचे कारण काय? अशी विचारणा अजित पवार यांनी केली. कार्यकर्त्यांना कुठलेही काम नव्हते आणि ते सहज भेटायला आले हे लक्षात आल्यानंतर पवारांनी सर्वांनाच खडे बोल सुनावले.