Nagpur : मनपा कर्मचारी करणार कामबंद आंदोलन

नागपूर : सातव्या वेतन आयोगाची १६ महिन्यांची थकबाकीसह इतर मागण्यांसाठी साखळी उपोषण करूनही प्रशासनाने दखल न घेतल्याने आता कामबंद आंदोलन केले जाणार आहे. राष्ट्रीय नागपूर कार्पोरेशन एम्प्लाईज असोसिएशनचे अध्यक्ष सुरेंद्र टिंगणे यांनी उपोषणानंतर झालेल्या सभेत कामबंद आंदोलनाचा निर्धार जाहीर केला.

महापालिकेतील कर्मचाऱ्यांना सातव्या वेतन आयोगाची १६ महिन्यांची थकबाकी देण्याचे मंजूर आहे. १५ विविध विभागातील कर्मचाऱ्यांना थकबाकीचा पहिला हफ्ता देण्यात आला. परंतु आयुक्तांनी थकबाकी न देण्याबाबत वित्त विभागाला आदेश दिल्याने कर्मचारी व शिक्षकांच्या रोषातून नुकताच १४ ते १६ सप्टेंबरदरम्यान संविधान चौकात साखळी उपोषण करण्यात आले. परंतु उपोषणाची व कर्मचाऱ्यांच्या मागणीची आयुक्तांनी दखलही घेतली नाही.

त्यामुळे कर्मचाऱ्यांत रोष आणखी वाढला आहे. साखळी उपोषणाला मनपा सेवानिवृत्त कर्मचारी, शिक्षक संघटनेचे भीमराव मेश्राम, शिक्षक संघटनेचे देवराव मांडवकर, राष्ट्रीय कार्पोरेशन एम्प्लाईज असोसिएशनचे महासचिव रंजन नलोडे, लोकक्रांती पॅनलचे राजकुमार कनाडे, ईश्वर मेश्राम, प्रवीण तंत्रपाळे, अरुण तुर्केल, धर्मदास मेश्राम आदी बसले होते.

त्यांनी उपोषणानंतर सभेत महापालिका प्रशासनाच्या कारभारावर ताशेरे ओढले. उपोषणासाठी संजय मोहळे, बाबा श्रीखंडे, मिलिंद चकोले, गौतम गेडाम, अभय अप्पनवार, हेमराज शिंदेकर, बळिराम शेंडे, योगेश बोरकर, संजय गाटकिने, विश्वास सेलुसुरकर, सतीश जनवारे, मनीष दुधमोगरे आदींनी प्रयत्न केले.

कर्मचाऱ्यांच्या मागण्या

• १६ महिन्यांची थकबाकी त्वरित द्यावी

• सातव्या वेतन आयोगानुसार ३ लाभांच्या सुधारित सेवांतर्गत आश्वासित प्रगती योजना लागू करणे

• कर्मचारी, शिक्षक, सेवानिवृत्तांना १ जानेवारी २०१६ पासून सातवा वेतन आयोग लागू करण्याचा प्रस्ताव शासनाकडे पाठवावा

• ऐवजदार सफाई कर्मचाऱ्यांना स्थायी करताना २० वर्षांची अट रद्द करावी

• सुधारित वाहतूक भत्ता लागू करावा

• रिक्त जागा पदोन्नतीने भराव्यात

• मनपा कर्मचाऱ्यांना गणवेश देण्यात यावे

• श्रम अधिकाऱ्यांची नियुक्ती करावी