Nagpur: हॉकर्स झोनमुळे नागरिकांमध्ये असंतोष, थेट उपमुख्यमंत्र्यांकडे केली तक्रार; निवडणुकीवर बहिष्कार टाकण्याचा इशारा

Nagpur Hawkers Zone: सभोवताली रहिवासी क्षेत्र असलेल्या नंदनवन कॉलनीत महापालिकेने हॉकर्स झोन प्रस्तावित केल्याने नागरिकांमध्ये मोठा असंतोष निर्माण झाला आहे. विशेष म्हणजे आमदार कृष्णा खोपडे आणि आमदार मोहन मते यांनी हॉकर्स झोन रद्द करण्याचे मागणी करूनही महापालिकेचे अधिकारी दाद देत नाही. महापालिकेत प्रशासक असल्याने लोकांच्या आणि लोकप्रतिनिधींच्या मताला किंमत राहिली नाही का, अशी विचारणा आता केली जात आहे.

नंदनवन कॉलनीच्या समोरून वाहणाऱ्या उघड्या नाल्याच्या दुर्गंधीचा त्रास दूर करण्यासाठी नाल्यावर स्लॅब टाकण्यात आली आहे. मात्र आता जगनाडे चौक ते गुरुदेवनगर या दरम्यानच्या याच नाल्यावर महापालिकेच्या अधिकाऱ्याने हॉकर्स झोन जाहीर केले आहे. नाल्याच्या डाव्या व उजव्या दोन्ही रहिवासी क्षेत्र असताना हॉकर्स झोन जाहीर केल्याने आश्चर्य व्यक्त केले जात आहे.

उच्च न्यायालयाने महापालिकेला फेरिवाला धोरणांतर्गत हॉकर्स जाहीर करण्याचे निर्देश दिले होते. प्रत्येक झोन कार्यालयाला हॉकर्स झोनच्या जागा निश्चित करण्यास सांगितले होते. मात्र अधिकाऱ्यांनी टेबलवर बसून रस्त्यांची नावे निश्चित केल्याचे दिसून येते.a

नंदनवन कॅनॉल रोड रहिवासी समितीच्यावतीने ६ डिसेंबरला हॉकर्स झोन रद्द करावा यासाठी मनपा आयुक्तांकडे निवेदन दिले आहे. आमदार कृष्णा खोपडे यांनी त्यापूर्वीच प्रस्तावित असतानाच तो रद्द करण्यास सांगितले होते. अलीकडे १३ डिसेंबरला हिवाळी अधिवेशनाच्या दरम्यान आमदार मोहन मते यांनी उपमुख्यमंत्री देवेंद्र फडणवीस यांनाही हॉकर्स झोन रद्द करण्याचे पत्र दिले आहे. मात्र मनपा प्रशासनाच्यावतीने कुठलीच दखल घेतली जात नाही.

निवडणुकीवर बहिष्कार टाकणार
राज्य शासन व महापालिका प्रशासनाने तत्काळ झोन रद्द केला नाही तर आगामी लोकसभा, विधानसभा व महापालिकेच्या निवडणुकीवर बहिष्कार घालण्याचा इशारा नंदनवन कॅनॉल रोड रहिवासी समितीने दिला आहे. या समितीत परिसरातील तब्बल साडेतीनशे लोकांचा समावेश आहे. (Latest Marathi News)