घनकचरा व्यवस्थापनात नागपूर स्मार्ट सिटीला ‘फाईव्ह स्टार’ मानांकन

नागपूर : केंद्र सरकारच्या गृहनिर्माण व शहरी विकास मंत्रालयाने जाहीर केलेल्या ‘स्मार्ट सिटी पुरस्कार २०२०’मध्ये (Smart City Award) घनकचरा व्यवस्थापनासाठी (Solid waste management) नागपूर स्मार्ट सिटीने ‘फाईव्ह स्टार' मानांकन मिळवले. याशिवाय हवामानासाठी ‘थ्री स्टार’ची (Three star for the weather) कमाई केली आहे. केंद्र सरकारने घोषित केलेल्या शंभर स्मार्ट सिटीमध्ये नागपूर स्मार्ट ॲन्ड सस्टेनेबल सिटी डेव्हलपमेंट कार्पोरेशन कंपनीची कामे वेगाने सुरू आहे. (Nagpur-Smart-City-Five-Star-Rating-in-Solid-Waste-Management)

पूर्व नागपुरात होऊ घातलेल्या या प्रकल्पात जमीन अधिग्रहण आदी पार पडले असून रस्ते, जलकुंभाची कामे सुरू आहे. शुक्रवारी केंद्र सरकारच्या गृहनिर्माण व शहरी विकास मंत्रालयाने घोषित केलेल्या पुरस्कारावरही नागपूर स्मार्ट सिटीने छाप पाडल्याचे मुख्य कार्यकारी अधिकारी भुवनेश्वरी एस. यांनी सांगितले. हवामानासाठी नागपूरला थ्री स्टार मिळाले. घनकचरा व्यवस्थापनासाठी फाईव्ह स्टार मिळाल्याचे त्यांनी नमुद केले. याशिवाय डाटा मॅच्युरिटी असेसमेंट फ्रेमवर्क या वर्गवारीत नागपूर स्मार्ट सिटीला पाचवा क्रमांक मिळाला.

स्मार्ट सिटी पुरस्कार विविध बाबींचे मूल्यांकन करून देण्यात आला. प्रशासन, संस्कृती, नागरी पर्यावरण, स्वच्छता, अर्थव्यवस्था, अंगभूत पर्यावरण, पाणी आणि शहरी गतिशीलता याबाबत मूल्यांकन करण्यात आले. गृहनिर्माण व शहरी विकास मंत्री हरदीपसिंग पुरी यांनी घनकचरा व्यवस्थापनाच्या थीमवर शहराच्या कामगिरीची दखल घेतली आहे. ‘ओला कचरा प्रक्रिया’ या थीम अंतर्गत शहराच्या तयारी अहवालात विशेष उल्लेख केला आहे. शहरी नियोजन, हिरवळ, जैवविविधता, ऊर्जा आणि ग्रीन इमारत, हवेची गुणवत्ता, पाणी व्यवस्थापन आणि घनकचरा व्यवस्थापन यावर मूल्यांकन करण्यात आले आहे.

‘डेटा मॅच्युरिटी असेसमेंट फ्रेमवर्क’चे निकालही जाहीर करण्यात आले. यात धोरण, नागरिक, प्रक्रिया, तंत्रज्ञान आणि परिणाम या पाच घटकांचा समावेश आहे. या मूल्यांकनात १०० ‘स्मार्ट सिटी’मध्ये नागपूर शहर पाचव्या क्रमांकावर असल्याचे त्यांनी सांगितले.

(Nagpur-Smart-City-Five-Star-Rating-in-Solid-Waste-Management)