Nagpur : शहराच्या स्वच्छतेसाठी ‘स्वच्छ मोहल्ला’ स्पर्धा

नागपूर : नागपूर शहर स्वच्छ आणि सुंदर राखण्यासाठी लोकसहभागातून महानगरपालिका आणि नागपूर @ २०२५ यांच्या संयुक्त विद्यमाने ‘स्वच्छ मोहल्ला’ स्पर्धेचे आयोजन केले आहे. स्वच्छ भारत मिशन अंतर्गत आयोजित या स्पर्धेत एखाद्या नगराचे किंवा भागाचे प्रतिनिधीत्व करणाऱ्या नागरिकांचा कोणताही समूह यात सहभागी होऊ शकतो, अशी माहिती मनपा आयुक्त तथा प्रशासक राधाकृष्णन बी. यांनी पत्रकार परिषदेत दिली.

नागरिकांनी यात सहभागी व्हावे याकरिता रोख रकमेचे पारितोषितसुद्धा दिले जाणार आहे. जी-२० साठी येणाऱ्या पाहुण्यांना आपले शहर चांगले दिसावे हा एकमेव उद्देश या स्पर्धेमागचा नाही. लोकांच्या सवयी बदलाव्या, आपल्या स्वच्छ शहराचा सर्वांना अभिमान वाटावा आणि गुंतवणूकदार आकर्षित व्हावे याकरिता स्वच्छतेची चळवळ निर्माण करण्यात येणार असल्याचे आयुक्तांनी सांगितले.

स्पर्धेत सहभागी होण्यासाठी मोहल्ला या भागात २०० पेक्षा कमी आणि ५०० पेक्षा जास्त घरे नसावी. मोहल्ल्यातील प्रतिनिधी ८३८०००२०२५ या व्हॉट्सॲप क्रमांकावरून किंवा ऑनलाईन लिंकच्या माध्यमातून स्पर्धेसाठी अर्ज दाखल करू शकतात किंवा ऑफलाईन माध्यमातून, नागपूर महानगरपालिकेच्या झोन कार्यालयात छापील अर्ज उपलब्ध करून देण्यात आले आहेत. ही स्पर्धा ३१ मार्च २०२३ पर्यंत सुरू राहणार आहे.