Nagpur Theft Case: पितळी भांडे धुवायला आले अन् दागिने घेऊन गेले, भरदुपारी घडली चोरीची घटना

Nagpur Theft Case in Shantinagar: पितळी भांडे स्वच्छ करून देण्याच्या नावावर दोन चोरट्यांनी महिला व तिच्या सुनेचे सोन्याचे दागिने लंपास केले. ही घटना शांतीनगर पोलिस ठाण्याच्या हद्दीत गुरुवारी (ता.८) दुपारच्या सुमारास उघडकीस आली.

पोलिसांनी दिलेल्या माहितीनुसार, ५८ वर्षीय महिलेच्या घरी गुरुवारी दुपारच्या सुमारास दोघे जण आले. त्यांनी पितळी भांडे स्वच्छ करून देतो अशी बतावणी केली. महिलेने पितळी तांब्या स्वच्छ करण्याकरिता दिला. ते स्वच्छ करून देताच, त्यांनी आपल्या सुनेच्या पायातील चाळही स्वच्छ करण्यासाठी दिली.

ती स्वच्छ केल्यावर दोघांनी सोन्याचे दागिनेही स्वच्छ करून देतो असे सांगितले. महिलेने ७८ हजार ८४२ रुपये किमतीच्या दोन सोन्याच्या पोत स्वच्छ करण्यासाठी त्यांच्याकडे दिल्या. दोघांनीही सुनेला हळद आणण्यास सांगितले. त्या आत गेल्यावर चोरट्यांनी महिलेचे दागिने डब्यात ठेवल्याचे भासविले आणि ते गॅसवर ठेवण्यास सांगून पसार झाले. दरम्यान सुनेने डबा उघडून बघितला असता, त्यात दागिने दिसले नाही. त्यामुळे फसवणूक झाल्याचे समजले.(Latest marathi News)