Nagpur News: हिवाळी अधिवेशनाचे आज वाजणार सूप

नागपूर : मागील आठवड्यात सुरू झालेले हिवाळी अधिवेशन अंतिम टप्प्यात पोहोचले असून उद्या सूप वाजणार आहे. मागील आठवडा तसेच आतापर्यंत विधीमंडळाचे दोन्ही सभागृह सत्ताधारी व विरोधकांच्या आरोप-प्रत्यारोपानेच गाजले. कलगीतुरा, टोलेबाजीमुळे सभागृहात हंशा पिकला तर काही सदस्यांमध्ये कलगीतुराही रंगला. आज मुख्यमंत्री व उपमुख्यमंत्र्यांनी विदर्भ, मराठवाड्याच्या प्रस्तावावर उत्तर देताना केलेल्या घोषणाच अधिवेशनाच्या फलित ठरल्या.(Nagpur News)

विधिमंडळाच्या हिवाळी अधिवेशनाचा कालावधी वाढविण्यात यावा, अशी मागणी सातत्याने विरोधी पक्षांकडून करण्यात आली. मात्र, कामकाज सल्लागार समितीच्या बैठकीत विरोधकांची मागणी फेटाळण्यात आली आहे.

त्यामुळे उद्या, शुक्रवारी अधिवेशनाचे सूप वाजणार आहे. यावरूनही सत्ताधारी व विरोधकांमध्ये आरोप-प्रत्यारोप करण्यात आले. सभेतील विरोधीपक्ष नेते अजित पवार यांनी बहुमताच्या जोरावर सत्ताधाऱ्यांनी अधिवेशन दोनच आठवड्यात गुंडाळल्याचा आरोप केला तर भाजप आमदार प्रवीण दरेकर यांनी विरोधकांची मानसिकता अधिवेशन कालावधी वाढवण्याची असती तर आमचीही तयारी होती, असे नमुद करीत विरोधकांवर खापर फोडले. १९ डिसेंबरला हिवाळी अधिवेशनाची सुरुवात झाली. विदर्भ, मराठवाड्याचे विषय कालपासून चर्चेला आले. यावर आज मुख्यमंत्री, उपमुख्यमंत्र्यांनी उत्तर देत अनेक घोषणा केल्या.

परंतु गेल्या आठ दिवसांत केवळ एकमेकांवर कुरघोडी, आरोपच जास्त झाले. मुख्यमंत्री एकनाथ शिंदे यांच्यावर नासुप्र जमिनीचा घोटाळा केल्याचा आरोप करीत विरोधकांनी राजीनाम्याची मागणी केली. गायरान जमिनीच्या घोटाळ्यावरून कृषिमंत्री अब्दुल सत्तार यांचा राजीनामा व हकालपट्टीच्या मागणीनेही दोन दिवस गाजवले. आज माजी उद्योगमंत्री सुभाष देसाई यांच्यावरील भूखंड घोटाळ्याच्या आरोपाची एसआयटी चौकशी करण्याची घोषणा उद्योगमंत्री उदय सावंत यांनी केली. एकमेकांवर आरोप, कुरघोडीतच आतापर्यंतचे कामकाज गाजले.