Nagpur : चर्चा न करताच विषय मंजूर; बंडखोरही आक्रमक

नागपूर : जिल्हा परिषदेच्या सभेत पत्रिकेवरील विषयांवर चर्चा न करताच अध्यक्षा मुक्ता कोकड्डे यांनी ते मंजूर करीत सभा गुंडळाल्याने संतप्त विरोधकांनी सभागृहातील साहित्याची फेकफोक करीत तोडफोड केली. सत्ताक्षातील बंडखोरांनाही विरोधकांना साथ दिली. यामुळे शेवटच्या टप्प्यात वातावरण चांगलेच तापले होते.

६ महिन्यानंतर जिल्हा परिषदेची सर्वसाधारण सभा सोमवारी पार पडली. पहिल्याच सभेत नवीन पदाधिकाऱ्यांची चांगलीच कसोटी लागली. सत्ताधारी पक्षात माजी अध्यक्षा रश्मी बर्व, प्रकाश खापरे, दुधाराम सव्वालाखे, तापेश्वर वैद्य, सलील देशमुख, उज्ज्वला बोढारे पदाधिकाऱ्यांच्या बचावाला धावून आले. त्यातही बर्वे विरोधकांवर हल्ला करण्यात अग्रेसर होत्या. विरोधकांनही चांगलीच आक्रमक भूमिका घेतली.

शिंदे- फडणवीस सरकारचे नाव येताच विरोधी पक्ष नेते आतिश उमरे व संजय झाडे यांनी सत्ताधाऱ्यांवर जोरदार हल्ला चढवला. सभेत अनेक सदस्यांनी मुद्दे मांडले. शेवटी विषय पत्रिकेला हात घालण्यात आला. अध्यक्षा मुक्ता कोकड्डे यांनी सर्व १ ते १० विषय मंजूर केल्याचे जाहीर केले. त्याच वेळेस आतिश उमरे, संजय झाडे व इतरांनी विषयांवर चर्चा करण्याची मागणी केली. परंतु अध्यक्षा कोकड्डे यांनी सभा गुंडळली. त्यामुळे संतप्त विरोधकांनी सभागृहातील टेबल, खुर्च्यांची तोडफोड केली. माइकही फेकले. कागदपत्रही भिरकावले.

कॉंग्रेसचे बंडखोर सदस्य नाना कंभाले यांनीही विरोधकांना साथ दिली. विषय पत्रिकेवरील विषयांना विरोध असून त्याची नोंद करण्याची मागणी सदस्यांना प्रशासनाकडे केली. दोन्ही पक्षांतील सदस्यांमध्ये शाब्दिक चकमक उडाली. गोंधळाची स्थिती निर्माण झाली होती. सर्वसाधारण सभेत कामांना स्थगिती दिल्याचा मुद्दा चांगलाच गाजला.