Nagpur : जिल्हा परिषदेची मान देशात उंचवली; रेन वॉटर हार्वेस्टिंग प्रयोगाची श्रीलंकेकडून दखल

नागपूर : जिल्हा परिषदेच्या अभियांत्रिकी विभागाने रेन वॉटर हार्वेस्टिंग करून पाणी व त्यासोबत वीज बचत आणि इमारतीचे तापमान थंड ठेवण्यात यशस्वी प्रगोय केला. या प्रकल्पाची दखल युनेस्काने घेतली. केंद्र सरकारच्या पंचायत राज मंत्रालयाने याचा सन्मान केला.

आता श्रीलंका सरकारने या उपक्रमाची दखल घेत सरनेट या संस्थेद्वारे आयोजित आंतरराष्ट्रीय परिषदेसाठी निवड केली आहे. ग्रामीण पाणी पुरवठा यांत्रिकी विभागाचे उपअभियंता नीलेश मानकर या परिषदेत प्रयोगाचे सादरीकरण करतील.

श्रीलंका येथील वॉटर मॅनेजमेंट इन्स्टीट्यूट, बतारमुल्ला येथे ही परिषद सुरू आहे. १७ ते १८ व २० ते २३ मे या कालावधीत रेन वॉटर हार्वेस्टिंग आणि त्याची साठवणूक पद्धती इतर विषयांवर या परिषदेत उपभियंता मानकर नागपूर जिल्हा परिषदेने राबविलेल्या या प्रकल्पांचे सादरीकरण करणार आहे़. संपूर्ण राज्यातून नागपूर जिल्हा परिषदेला हा बहुमान मिळाला आहे. पुणे येथील स्वयंसेवी संस्थेचा एक प्रतिनिधीचा समावेश आहे. जिल्हा परिषदेची मान संपूर्ण देशात उंचावली आहे.

या देशांचा समावेश

या आंतरराष्ट्रीय परिषदेत नेपाल, पाकिस्तान, मालदीव व भारतातील काही निवडक जणांची उपस्थिती आहे.

येथे राबवला प्रकल्प

जिल्ह्यातील आदासा मंदिर, भांडारबोडी, नगरधन आरोग्य केंद्रे येथे हा प्रयोग यशस्वी झाला आहे. त्यानंतर पुणे येथील राष्ट्रीय कार्यशाळेत या मॉडेलला प्रथम विशेष सन्मान मिळाला होता. जिल्हा परिषदेचे हे मॉडेल उपअभियंता मानकर व त्यांच्या टीमने सातासमुद्रापार नेले.

काय आहे रेन वॉटर हार्वेस्टिंग मॉडेल?

अनेक जागी रेन वॉटर हार्वेस्टिंग शक्य होत नाही. अशा इमारतींचा अभ्यास करून छतावर पॅराफीट वॉल, विशिष्ट प्रकारचा उतार काढल्या जातो. छताला गळती व उष्णताविरोधक पेंट लावण्यात येतो. संपूर्ण वॉटर हार्वेस्टिंगचे पाणी रिचार्ज शॉप पद्धतीने साठविण्यात येते. ज्याचा फायदा इमारतीसमोरील वृक्ष, बागा जगविण्यासाठी आपोआप होतो. या सर्व प्रक्रियेमुळे इमारतीचे तापमानही कमी होण्यास मदत होते.