Nagpur: स्वातंत्र्यदिनानिमित्त आल्या इलेक्ट्रिक बस, गडकरींनी दाखवला हिरवा झेंडा

नागपूर : महापालिकेला १७ इलेक्ट्रिक बस मिळाल्या असून आजपासून श्रीकृष्णनगर मार्गावर बस सुरू करण्यात आली. तिकिटासाठी ॲप तयार करण्यात येत असून नागरिकांना कार्डचा वापर करावा लागणार आहे. त्यामुळे टप्प्याटप्प्याने बस सुरू करण्यात येणार असल्याचे अधिकाऱ्यांनी नमुद केले.

स्वातंत्र्याच्या अमृतमहोत्सवानिमित्त शहराला १७ इलेक्ट्रिक बस मिळाल्या. या बसचे सोमवारी केंद्रीय रस्ते परिवहन मंत्री नितीन गडकरी यांच्या हस्ते लोकार्पण करण्यात आले. यावेळी आमदार कृष्णा खोपडे, विकास कुंभारे, मनपा आयुक्त राधाकृष्णन बी, नागपूर स्मार्ट सिटीचे मुख्य कार्यकारी अधिकारी चिन्मय गोतमारे, अतिरिक्त आयुक्त दीपक कुमार मीना, राम जोशी, माजी परिवहन सभापती बंटी कुकडे व्यासपीठावर उपस्थित होते.

चार्जिंग केंद्र वाढविणार

याशिवाय सद्यस्थितीत इलेक्ट्रिक बस चार्जिंगसाठी एकच वर्धमाननगर येथील एकच केंद्र आहे. येथे सहा चार्जिंग पॉईंट आहेत. एकदा बस चार्जिंग केल्यानंतर दोनशे किमीपर्यंत धावते. एका बसला चार्जिंगसाठी दोन तासांचा अवधी लागतो. १७ बससाठी चार्जिंग स्टेशन पुरेसे असले तरी ते एकाच ठिकाणी आहे. त्यामुळे वर्धमाननगरवरून चार्जिंग होऊन शहराच्या इतर भागात जाण्यासाठी या बसला मोरभवन येथे यावे लागणार आहे. यातच अधिक वेळ जाणार आहे. शहरात आणखी चार्जिंग स्टेशन वाढविण्याची गरज आहे. पंतप्रधान योजनेतून १४५ बस आणखी मिळणार आहेत. वाडी येथे तसेच वाठोडा येथे १८ एकरात चार्जिंग स्टेशन प्रस्तावित आहे. महापालिकेला चार्जिंग स्टेशनसाठी लवकर पाउले उचलावी लागणार आहे.

कार्ड वापरूनच प्रवास शक्य

या बसच्या तिकिटासाठी नागरिकांना कार्डचा वापर करावा लागणार आहे. सध्या एकाच बससाठी ही सुविधा करण्यात आली आहे. या बसमधून प्रवासासाठी ॲप तयार करण्यात आले आहे. बसमध्ये वाहक राहणार नाही. डिजिटल कॅशने व्यवहार होणार आहे. नागरिकांना कार्ड देण्यात येणार असून ते रिचार्ज करावे लागणार आहे. बसमध्ये चढताना ॲपमध्ये कार्ड टॉप इन करावे लागणार आहे. जिथपर्यंत ज्यायचे आहे, तिथपर्यंतच्या तिकिटचे पैसे यातून कमी होईल. सर्वच बसमध्ये हे ॲप राहील. नागरिकांना कार्ड देण्याची प्रक्रिया राबविण्यात येईल. त्या प्रक्रियेला नागपूरकर कसा प्रतिसाद देतात, यावरच इलेक्ट्रिक बसचे भवितव्य ठरणार आहे.

एकच बस सुरू

शहराला १७ बस मिळाल्या असल्या तरी आजपासून केवळ एकच बस सुरू करण्यात आली. मोरभवन ते श्रीकृष्णनगरपर्यंत या मार्गावर ही बस सुरू करण्यात आली. येत्या काही दिवसांत पाटणसावंगी, बुटीबोरी, बहादुरा, पिपळा फाटा, कन्हानपर्यंत या बस धावतील.

साध्या बसच्या दरातच प्रवास

इलेक्ट्रिक बसमधून प्रवासाचे तिकिटाचे दर साध्‍या बसएवढेच असल्याने नागरिकांवर भुर्दंड पडणार नाही, असे उपायुक्त व परिवहन व्यवस्थापक भेलावे यांनी सांगितले. प्रवाशांन डिजिटल कॅशचा वापर करावा लागणार आहे. प्रायोगिक तत्त्वावर ही एक बस सुरू करण्यात आली. टप्प्याटप्प्याने इतरही बस सुरू करण्यात येईल, असेही भेलावे म्हणाले.

नागपुरात पर्यावरणाचे संवर्धन करण्यासाठी महत्वाचे निर्णय घेतले जात आहेत. नागपूर देशातील इतर राज्यांना पथदर्शक ठरणार आहे. पर्यावरणपूरक ई-बसेससाठी नागपूर महानगरपालिकेचे अभिनंदन. वायू, पाणी आणि ध्वनी प्रदूषण कमी करण्यासाठी मनपाने प्रयत्न करावे. कर्मचाऱ्यांनीही बस व्यवस्था फायद्याची करण्यासाठी प्रयत्न करावे.

-नितीन गडकरी,केंद्रीय मंत्री, रस्ते परिवहन