Nagpur : ५० टक्केच शेतकऱ्यांना कर्ज वाटप; पावसालाही विलंब उद्दिष्ट गाठण्यात बँका अनुत्सूक

Nagpur : खरीप हंगाम सुरू झाला आहे. पावसाला झालेल्या विलंबाचा पेरण्यांवर परिणाम झाला आहे. त्यामुळे आता पेरण्या आटोपण्याची घाई शेतकऱ्यांकडून होत आहे. परंतु त्यांना कर्ज देण्यास बॅंकांकडून पाहिजे तसे सहकार्य मिळत नसल्याचे दिसते. आतापर्यंत बॅंकांकडून फक्त ५० टक्केच कर्ज वाटप करण्यात आले आहे.

यावेळी पावसाला विलंब झाला. त्यामुळे पेरण्यांनाही उशीर झाला आहे. आता पेरण्यां सुरू झाल्या आहेत. पण शेतकऱ्यांना कर्ज मिळण्यास होत असलेल्या विलंबाचा फटका पेरण्यांना बसत असल्याची चर्चा आहे. शेतकऱ्यांच्या हातात पैसा नसल्याने त्यांना साहित्य खरेदी करता आलेले नाही.

त्यामुळे नाईलाज होऊन अनेक शेतकऱ्यांना सावकारांकडे जावे लागत असल्याचे वास्तव आहे. शासनाने दोनदा कर्जमाफी दिली. त्यामुळे कर्ज वाटपाचा आकडा वाढेल अशी अपेक्षा व्यक्त करण्यात येत होती. परंतु बॅंका फारशा उत्सुक नसल्याचे दिसते.

बॅंकाकडून मिळत नाही सहकार्य

यावर्षी नागपूर जिल्ह्याला १ हजार ४३० कोटी ६६ लाख रुपये कर्ज वाटप करण्याचे उद्दिष्ट होते. साधारणतः १ लाख २२ हजार ९२६ शेतकऱ्यांना हे कर्ज वितरित होईल, अशी अपेक्षा होती. ३० जूनपर्यंत ५२ हजार २३३ शेतकऱ्यांना ७१७ कोटी ४३ लाखांचे कर्ज वाटप झाले. हे उद्दिष्टाच्या ५० टक्केच आहे.

काही बॅंकांनी ४० टक्केही उद्दिष्ट गाठलेले नाही. बॅंकाकडून कर्ज पुरवठ्यासाठी एकप्रकारे सहकार्य केले जात नसल्याचे दिसूव येत आहे. त्यामुळे अशा बॅंकांवर कोणती कारवाई होते, याकडेच सर्वांचे लक्ष लागले आहे.

तालुकास्तरीय शिबिरही झाले बंद

तत्कालीन जिल्हाधिकारी सचिन कुर्वे यांनी पीक कर्ज वाटपासाठी तालुकास्तरावर शिबिरांचे आयोजन सुरू केले होते. बॅंक, सहकार, महसूल व संबंधित विभागाचे कर्मचारी, अधिकारी उपस्थित राहायचे. त्यामुळे कर्ज मिळण्यास शेतकऱ्यांना सोयीचे होत असे.

परंतु अलीकडच्या काही वर्षांत शिबिरांचे आयोजन बंद झाले. त्यामुळे शेतकऱ्यांना कर्जासाठी अनेक ठिकाणी चकरा माराव्या लागतात.