Nagpur Winter Update : गुरुवारची रात्र ठरली मोसमातील सर्वात थंड ; नागपूरच्या पाऱ्यात पुन्हा सहा अंशांची घट

नागपूर : विदर्भातील थंडीच्या लाटेने उग्र रूप धारण केले असून, नागपूरच्या पाऱ्यात पुन्हा सहा अंशांची घट झाली आहे. शहरात गुरुवारी नोंद झालेले ८.७ अंश सेल्सिअस तापमान विदर्भात नीचांकी ठरले. नागपूरकरांसाठी गुरुवारची रात्र या मोसमातील सर्वात थंड राहिली.

जम्मू-काश्मीरसह डोंगराळ भागांमध्ये सुरू असलेल्या जोरदार बर्फवृष्टीमुळे विदर्भात दोन दिवसांपासून कडाक्याची थंडी जाणवत आहे. सध्या विदर्भात सगळीकडेच थंडीची तीव्र लाट अनुभवायला मिळत आहे. गुरुवारी लाटेचा सर्वाधिक प्रभाव नागपुरात जाणवला. लाटेमुळे गेल्या दोन दिवसांत नागपूरच्या तापमानात तब्बल अकरा अंशांची घसरण झाली. मंगळवारी १९.४ वरून पारा काल १४.६ अंशापर्यंत घसरला होता. आज पुन्हा ५.९ नी घसरून नीचांकी ८.७ अंशावर स्थिरावला. त्यामुळे गुरुवारची रात्र नागपूरकरांसाठी यंदाच्या हिवाळ्यातील सर्वात थंडगार रात्र ठरली. याआधी १९ डिसेंबरला नागपुरात नीचांकी (९.४ अंश सेल्सिअस) तापमानाची नोंद करण्यात आली होती.

विदर्भातील यवतमाळ (९.० अंश सेल्सिअस), गोंदिया (९.५ अंश सेल्सिअस), अकोला (९.५ अंश सेल्सिअस), बुलडाणा (१०.० अंश सेल्सिअस), वर्धा (१०.६ अंश सेल्सिअस) या जिल्ह्यांमध्येही थंडीचा कहर दिसून आला. बोचरे वारे व हुडहुडीमुळे आबालवृद्धांसह सर्वच जण त्रस्त आहेत. कडाक्यामुळे नागरिकांना ऊनी कपड्यांसह शेकोट्यांचाही आधार घ्यावा लागत आहे. थंडीसाठी सध्या अनुकूल वातावरण असल्यामुळे या आठवड्यात पारा आणखी घसरण्याची शक्यता प्रादेशिक हवामान विभागाने वर्तविली आहे.