लॉकडाउनमुळे रोजगार बुडाला, मात्र, उदरनिर्वाहासाठी त्यांनी शोधला नवा पर्याय

नागपूर : लॉकडाउननंतर जमावबंदीमुळे नियमित कामे बंद झाली. त्यामुळे अनेकांवर उपासमारीची वेळ आली. उदरनिर्वाहासाठी अनेकांनी चक्‍क घरोघरी फळे व भाजीपाला विकणे सुरू केले आहे. तात्पूरत्या व्यवसायाने कठीण काळात त्यांना मोठा आधार मिळाला आहे. तरीही कोरोनाचे संकट असेच कायम राहिले तर पुढे काय करायचे हा प्रश्‍न अनेकांना सतावत आहे.

सीएसी ऑलराउंडर या साहसी संस्थेच्या कर्मचारीही सध्या अडचणीत सापडले आहे. कारण नियमीत काम बंद झाले असून सुरू केलेले काम किती दिवस साथ देईल, याविषयी शाश्‍वती नाही. त्यामुळे त्यांची चिंता वाढली आहे. या संस्थेची एक शाखा रामटेके येथे आहे. खिंडसी तलाव आणि रामटेक परिसरात साहसी शिबिराचे आयोजन या संस्थेमार्फत केले जाते. त्यासाठी येथे जवळजवळ 50 जण कामाला आहेत. मात्र लॉकडाउनमुळे शिबिर बंद झाले. खिंडसी तलावावर येणारे बंद झाले. पर्यायाने संस्थेचे काम थांबले. त्यामुळे या कर्मचाऱ्यांचा रोजगार हिरावल्या गेला. त्यामुळे सर्वांवर बेरोजगारीची वेळ आली.

वाचा - लॉकडाउनमुळे टेलरिंग व्यावसायिकांना बसला फटका; कारागिरांवर उपासमारीची वेळ
जगण्यासाठी आता पुढे करायचे या विचारात असताना त्यांनी या कठीण प्रसंगी नशिबाला दोष न देता उदरनिर्वाहासाठी भाजीपाल्याचा नवा व्यवसाय करण्याचा निर्णय घेतला. संस्थेचे संचालक अमोल खंते यांनी यासाठी पुढाकार घेतला. ते म्हणाले, लॉकडाउनमुळे सध्या कॅम्प बंद आहे. त्यामुळे उदरनिर्वाहासाठी कर्मचाऱ्यांना हातपाय हालविण्याशिवाय दुसरा पर्याय नव्हता. म्हणूनच त्यांनी फळे व भाजीपाल्याचा पर्याय निवडला. मित्रया फार्मर्सच्या बॅनरखाली सीएसीचे कर्मचारी रामटेकमधील शेतकऱ्यांकडून भाजीपाला विकत घेऊन माफक दरात घरोघरी देत आहेत. शेतकऱ्यांकडून माल विकत घेतल्यानंतर तो व्यवस्थित "पॅकिंग' करून गरजू व्यक्‍तींना "होम डिलिव्हरी' केली जाते.

आणखी वाचा - अनाथ वधूचे पोलिसांनीच केले कन्यादान

उल्लेखनीय म्हणजे, यासंदर्भात ते सोशल मीडियावरून जाहिरातही करीत आहेत. यातून त्यांची चांगली कमाई होत असून, लॉकडाउनमुळे अचडणीत सापडलेल्या शेतकऱ्यांनाही फायदा होत असल्याचे त्यांनी सांगितले. याशिवाय काही जण कापडी पिशव्या शिवण्याचे काम करीत आहेत. यासाठी त्यांना सीएसी ऑलराउंडरतर्फे विशेष प्रशिक्षणही देण्यात आले आहे.