नवरदेवांवर आली ‘घोड्यावरून वरात नाको रे बाबा!’ म्हणण्याची वेळ

भंडारा : भंडारा नगर परिषद क्षेत्रातील घोडे व खेचरांचे नमुने पॉझिटिव्ह आले आहेत. हा आजार संसर्गजन्य असून, मानवासाठी धोकादायक आहे. त्यामुळे कोणत्याही कार्यक्रमात घोडे, गाढव खेचरांचा वापर करण्यास जिल्हा प्रशासनाने मनाई केली आहे. त्यामुळे सध्या लग्नसराई सुरू असली तरी ‘घोड्यावरून वरात नको रे बाबा’, असे म्हणण्याची वेळ नवरदेवांवर आली आहे.

गेल्यावर्षी मार्च महिन्यापासून देशाची गती रोखून बसलेल्या कोरोनामुळे कर्मचारी, कामगार, विद्यार्थी व उद्योजक सर्वच प्रभावित झाले आहेत. त्यामुळे कधीही न थांबणाऱ्या भारतीय रेल्वेच्या चाकांनी अजूनही पुरेसा वेग घेतलेला नाही.

त्यानंतर डिसेंबरपासून राज्यात विविध ठिकाणी बर्ड फ्लूचा प्रादुर्भाव झाल्याने पोल्ट्री उद्योगावर अवकळा आली. यातच आता अश्‍ववर्गीय प्राण्यांमध्ये ग्लॅंडर्स आजाराचा प्रादुर्भाव दिसून आला आहे. पशुसंवर्धन विभागाने देशात प्रसार होत असलेल्या आजाराबाबत वेळेवरच नमुने गोळा करून प्रयोगशाळेतून तपासणी केली.

अधिक माहितीसाठी - सावधान! मुली पळवणारी टोळी सक्रिय; पारशिवनी तालुक्यात घडताहेत एकापाठोपाठ घटना

भंडारा नगर परिषदेच्या हद्दीतील घोडे, खेचरांमध्ये या आजाराचे लक्षण असून, त्यांचे नमुने पॉझिटिव्ह आले आहेत. त्यामुळे जिल्ह्यातील घोडावर्गीय प्राण्यांमधील रोग नियंत्रणासाठी जिल्हा प्रशासनाने सदर प्राण्यांची जिल्ह्यातून ने-आण करण्यास मनाई केली आहे. तशी अधिसूचना जारी करण्यात आली आहे.