कोरोनाबाधित भागात तैनात पोलिसाची आत्महत्या, विदर्भातील या जिल्ह्यात उडाली खळबळ

यवतमाळ : देशात दिवसेंदिवस कोरोनाचा प्रादुर्भाव वाढत चालला असून राज्यांतही याचे प्रमाण सर्वाधिक आहे. यातच यवतमाळ पोलिस मुख्यालयात कार्यरत असलेल्या पोलिस कर्मचार्‍याने गळफास लावून आत्महत्या केली. ही घटना मंगळवार (ता.12) रात्री आठच्या सुमारास पोलिस मुख्यालयातील शासकीय निवासस्थानी उघडकीस आली. त्यामुळे जिल्ह्यात मोठी खळबळ उडाली आहे.

उमरखेड तालुक्यातील जेवली येथील संजय रतीराम साबळे हे काही दिवसांपासून पोलिस मुख्यालयात कर्तव्यावर होते. त्यांची ड्यूटी शहरातील कोरोनाबाधित भागातील इंदिरानगर या ठिकाणी होती. मगंळवारी ते पळसवाडी येथे असलेल्या आपल्या शासकीय निवासस्थानी परतले. घरात आल्यानंतर त्यांनी गळफास लावून घेतला.

- मुख्यमंत्र्यांनी लॉकडाउन शिथिल करण्याची हिंमत दाखवावी : देवेंद्र फडणवीस 

शासकीय निवासस्थानात घेतला गळफास
गेल्या काही दिवसांपासून संजयची पत्नी माहेरीच आहे. बाळंतपणासाठी पत्नी माहेरी गेल्याने ते घरी एकटेच राहत होते. संजय यांच्या आत्महत्येचे कारण समजू शकले नाही. घटनेची माहिती मिळताच अप्पर पोलिस अधीक्षक नुरूल हसन यांनी घटनास्थळी भेट दिली. पोलिस कर्मचार्‍यांच्या आत्महत्येने जिल्हा पोलिस दलात एकच खळबळ उडाली आहे. आत्महत्येमागील कारण समोर आले नाही.