कापूस कोंडी; दीड लाखांवर शेतकऱ्यांची नोंदणी 

यवतमाळ : शेतकऱ्यांची अडचण दूर करण्यासाठी कापूस खरेदी सुरू झाली असली तरी खरेदीची गती पाहता शेतकऱ्यांची अडचण होत आहे. याच गतीने खरेदी सुरू राहिल्यास पावसाळ्यातही कापूस खरेदी सुरू राहण्याची शक्‍यता आहे. पावसापूर्वी नोंदणी झालेल्या शेतकऱ्यांच्या कापूस खरेदीचे नियोजन पणन महासंघाने केले असून यासाठी कृषी विभागाकडे कर्मचाऱ्यांची मागणी केली आहे. 

हे वाचा—कोरोना काळाची नवी गरज, लर्न फ्रॉम होम 

केंद्र वाढविण्याचे नियोजन 

लॉकडाउन असल्याने शेतकऱ्यांचा शेतमाल घरातच होता. परिणामी, खरीप हंगामात शेतकरी आर्थिक संकटात सापडण्याची शक्‍यता होती. त्यामुळे शेतकऱ्यांनी कापूस खरेदीची मागणी केली होती. त्यानुसार पणन महासंघाने खरेदी सुरू केली. मात्र, केंद्रावर ग्रेडर नसल्याने तसेच सोशल डिस्टन्सिंगचे पालन होण्याच्या दृष्टीने एका दिवसात केवळ वीस गाड्या मोजण्याचे आदेश होते. याच गतीने खरेदी केल्यास ती पावसाळ्यातही सुरू राहणार आहे. पावसात शेतकऱ्यांची अडचण होऊ नये, म्हणून आता पणन महासंघाने केंद्र वाढविण्याचे नियोजन सुरू केले आहे. 

हे वाचा—कोरोनामुळे पुस्तकेही कुलुपात, राज्यातील तब्बल बारा हजार ग्रंथालये बंदच 

"पणन'ची कृषी विभागाकडे कर्मचाऱ्यांची मागणी 

केंद्रावर ग्रेडरची आवश्‍यकता असल्याने कृषी विभागाकडे कर्मचाऱ्यांची मागणी महासंघाने केली असून त्यांना प्रशिक्षण दिले जाणार आहे. प्रशिक्षण झाल्यानंतर केंद्र वाढविण्याचा विचार पणन महासंघाचा आहे. लॉकडाउनमध्ये महासंघाचे 58 केंद्रावर 82 जिनिंगमध्ये खरेदी सुरू आहे. या काळात महासंघाने राज्यभरात तीन लाख 57 हजार 820 क्विंटल कापसाची खरेदी केली आहे. 

शेतकऱ्यांची अडचण होऊ नये म्हणून आम्ही केंद्र वाढविणार आहोत. ग्रेडर म्हणून कृषी विभागातील कर्मचाऱ्यांना प्रशिक्षित केले जाणार आहे. संबंधित ठिकाणची स्थिती पाहून गाड्याची संख्या वाढविण्याचे आदेश दिले आहेत. पावसाळ्यापूर्वी कापूस खरेदीचा आमचा प्रयत्न आहे. 
-अनंतराव देशमुख, अध्यक्ष, पणन महासंघ. 

• लॉकडाउनच्या काळात झालेली खरेदी 
• नागपूर-35 हजार 755 
• वर्धा-18 हजार 254 
• चंद्रपूर-20 हजार 450 
• गडचिरोली-तीन हजार 408 
• यवतमाळ-49 हजार151 
• अकोला-13हजार992 
• वाशीम-चार हजार 252 
• अमरावती-49हजार367 
• बुलडाणा-सहा हजार 189 
• औरंगाबाद-दोन हजार 740 
• नगर-12 हजार455 
• परभणी-25हजार 757 
• बीड-27हजार 836 
• उस्मानाबाद-दोन हजार438 
• नांदेड-सहा हजार 788 
• जळगाव-46हजार91 
• नाशिक-दोन हजार 341