मोहाडीच्या तलावात सरपंचाने केले अतिक्रमण...मग गावकऱ्यांनी केली तहसीलदारांकडे तक्रार

सकाळ वृत्तसेवा
Thursday, 28 May 2020

मोहाडी येथील शासकीय तलावात सरपंचाने अतिक्रमण केले आहे. तलावातील मातीचे खोदकाम करून तलावाचे सपाटीकरण करण्यात आले. त्यामुळे या तलावातील पाणी शेतीला मिळणे दुरापास्त झाले आहे. त्यामुळे तहसीलदारांनी सरपंचावर कारवाई करण्याची मागणी गावकऱ्यांनी केली आहे.

गोरेगाव (जि. गोंदिया) : तालुक्‍यातील मोहाडी येथील महिला सरपंच व त्यांच्या पतीने गेल्या पाच वर्षांपूर्वी गावातील शासकीय तलावाच्या जमिनीत अतिक्रमण करून पक्की शौचालय इमारत, आवारभिंतीचे बांधकाम केले आहे.

तसेच दोन दिवसांपूर्वी त्यांनी तलावाच्या जमिनीत बाहेरून माती आणून त्याचे सपाटीकरण केल्याने त्यांच्यावर कारवाई करण्यात यावी, अशी तक्रार गावकऱ्यांनी तहसीलदारांना सोमवारी (ता. 25) ऑनलाइन अर्जाद्वारे केली आहे.

गावकऱ्यांनी दिलेल्या तक्रारीत नमूद केले आहे की, मोहाडी येथे गावालगत गट क्रमांक 125, आराजी 2.12 हेक्‍टर आर. क्षेत्राचे शासकीय तलाव आहे. या तलावातील पाण्यापासून खरीप भात पिकाकरिता 50 एकर शेतजमिनीला पाणीपुरवठा केला जातो. अशा शासकीय तलावाच्या जमिनीत सरपंच रजनी धपाडे व त्यांचे पती अरविंद धपाडे यांनी 5 वर्षांपूर्वी अतिक्रमण केले. त्यात आवारभिंतीचे व शौचालय इमारतीचे बांधकामसुद्धा केले आहे. त्यामुळे तलावाचे सपाटीकरण झाले आहे.

...तर शेतीला पाणी मिळणार नाही

आता विनापरवाना बाहेरून माती खोदकाम करून आवारभिंतलगतच्या जमिनीवर सपाटीकरण करीत आहे. त्यामुळे या तलावातून शेतजमिनीला पुरेशा पाणी मिळणार नाही. त्याचा शेतकऱ्यांना आर्थिक फटका बसणार आहे. गावाच्या प्रथम नागरिकाने तलावात अतिक्रमण करणे म्हणजे ग्रामपंचायत अधिनियमाची पायमल्ली असल्याचा आरोपही गावकऱ्यांनी केला आहे.

अतिक्रमणाची चौकशी करून कारवाई करा

महिला सरपंचाचे पती शिक्षक आहेत. तलावाच्या जमिनीत अतिक्रमणाची चौकशी करून दंडात्मक कारवाई करण्यात यावी, अशी मागणी धुर्वराज पटले, जागेश्वर पटले, परमानंद तिरेले, यादोराव पटले, श्रीराम पारधी, संजय पारधी, योगेश्वर पटले, देवचंद पटले, महेश बिसेन यांनी जिल्हाधिकारी, उपविभागीय अधिकारी तिरोडा, मुख्य कार्यपालन अधिकारी, प्रधान सचिव महसूल विभाग, मुंबई यांना एका ऑनलाइन तक्रारीद्वारे केली आहे.

जाणून घ्या : सरपंचावर सध्या तरी कारवाई नाही, उच्च न्यायालयाचा आदेश

गावात राजकारण केले जात आहे
गावात राजकारण केले जात आहे. शौचालय इमारत बांधकाम, आवारभिंतीचे बांधकाम 15 वर्षांपूर्वीचे आहे. माती खोदकाम करून तलावात सपाटीकरण केले जात नाही. ती माती दिराच्या घरी बांधकाम असलेल्या जागेची आहे.
- रजनी धपाडे, सरपंच, मोहाडी.
 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Sarpanch encroachment on Mohadi's lake