शिवसेना उपशहर प्रमुख पत्नीसह अपघातात ठार 

दर्यापूर (जि.अमरावती) : दर्यापूर ते अकोला रोडवरील तोंगलाबाद-सौंदळी फाट्याजवळ २१ डिसेंबर रोजी रात्री ११ ते १२ वाजेदरम्यान चारचाकी वाहनाचा भीषण अपघात झाला. या अपघातात पती-पत्नी जागीच ठार झाले, तर मुलगा गंभीर जखमी आहे.

दर्यापूर शहरातील दिलीप एजन्सीचे संचालक तथा शिवसेना उपशहर प्रमुख विजय खंडारे (वय ४२), त्यांची पत्नी वृषाली खंडारे (वय ३६) व मुलगा सुयश (वय ९) हे रात्री नातेवाइकाकडे जाण्यासाठी आपल्या कारने निघाले असता अचानक समोरून येणा-या ट्रकने त्यांच्या वाहनाला जोरदार धडक दिली.

अपघात एवढा भीषण होता की त्यांची कार अक्षरशः चकनाचुर झाली. रात्रीची वेळ असल्याने त्या धडकेचा आवाज टोंगलाबाद-सौंदळी गावापर्यंत पोहोचला. गावातील नागरिक तत्काळ धावले. जखमी अवस्थेत असलेल्या शिवसेना उपशहर प्रमुख विजय खंडारे (वय ४२), त्यांची पत्नी वृषाली खंडारे (वय ३६) व मुलगा सुयश (वय ९) यांना रात्रीच अकोला येथील खासगी रुग्णालयात भरती करण्यात आले.

मात्र विजय खंडारे व वृषाली खंडारे या पती-पत्नीला मृत घोषित करण्यात आले. या घटनेने सर्वत्र हळहळ व्यक्त होत आहे.

(संपादन - विवेक मेतकर)