श्रीक्षेत्र रावेरी येथील सीता मंदिरातील माती अयोध्येला रवाना! वाचा काय आहे इतिहास

राळेगाव (जि. यवतमाळ) : येत्या 5 ऑगस्ट रोजी अयोध्येतील राम मंदिराचे भूमीपूजन आहे. त्यासाठी भारतातील विविध ठिकाणची माती आणि जल अयोध्येला रवाना होते आहे. विदर्भातील रावेरी येथील मातीही अयोध्येला रवाना झाली आहे. त्यामागे विशेष पौराणिक संदर्भ आहे. तो म्हणजे रावेर इथे भारतातील एकमेव सीता मंदिर आहे. म्हणूनच यवतमाळ जिल्ह्यातील राळेगाव शहरापासून तीन किलोमीटर असलेल्या श्रीक्षेत्र रावेरी येथील माती (मृदा ) व रामायणात उल्लेख असलेल्या तमसा नदीचे (रामगंगा )जल, जगातील एकमेव भव्यदिव्य अयोध्या येथील श्रीराम मंदिराच्या पायाभरणी करीता पाठविण्यात आली.

5 ऑगस्टला होणाऱ्या अयोध्या येथील श्रीराम मंदिराच्या पायाभरणीच्या निमित्ताने पुन्हा रावेरी हे गाव व येथील सीता मंदिर पुन्हा प्रकाश झोतात आले आहे. रावेर इथे सीता मंदिर असण्याला पौराणिक संदर्भ आहे.

श्रीरामाने राज्याभिषेकानंतर लोकोपवादामुळे माता सीतेला वनवासात सोडले होते, तेव्हा सीतेचे वास्तव्य दंडकारण्याच्या याच भागात होते. इथे श्रीवाल्मिकी ऋषींचा आश्रम होता. सीतामाईनी त्या आश्रमातच लवकुशांना जन्म दिला. लवकुशांनी आपले शिक्षण याच ठिकाणी श्री वाल्मीकी ऋषिच्या मार्गदर्शनात पूर्ण केले. ते धर्नुविद्येत निपूण झाले. आजही वाल्मिकी ऋषिंच्या आश्रमाच्या खुणा याठिकाणी पहायला मिळतात.

सविस्तर वाचा - काय सांगता! प्रतिबंधित क्षेत्रातील सीसीटिव्हिला चोरीची वीज;  वर्धा जिल्ह्यातील नामदेव मठ परिसरातील प्रकार..

प्रभू श्रीरामानांनी अश्वमेघ यज्ञाचा घोडा संपूर्ण भारतवर्षात सोडला तो घोडा बाल लवकुशांनी याच ठिकाणी अडविला, अशी आख्यायिका आहे. सीतामातेच्या वास्तव्याने पावन झालेल्या या ठिकाणी सीता मंदिर आहे. त्यामुळे त्या मंदिराचे विशेष महत्त्व आहे. म्हणूनच मंदिर पारिसरातील मृदा (माती) आणि रामगंगा नदीचे जल अयोध्या येथील मंदिराच्या पायाभरणीसाठी पाठविण्यात आले असून त्यामुळे रावेरी येथील सीता मंदिर पुन्हा अयोध्येशी जोडले जाणार आहे. मंदिर परिसरातील माती (मृदा )पाठवितेवेळी मंदिर परिसरात विधीवत पूजा करण्यात आली आणि खोदकाम करून माती अयोध्येला पाठविण्यात आली. यावेळी गावकरीउपस्थित होते.

संपादन - स्वाती हुद्दार