कुटुंबीयांनी मुलीचा मृतदेह वेकोलिच्या कार्यालयासमोर आणून ठेवला; अपमानास्पद वागणूक आणि मानसिक त्रास

राजुरा (जि. चंद्रपूर) : वेकोलिच्या बल्लारपूर क्षेत्राअंतर्गत येणाऱ्या पोवनी-३ कोळसा खाणीतील प्रकल्पग्रस्त १९ वर्षीय युवतीने आत्महत्या केली. नोकरीसाठी लागणाऱ्या कागदपत्रांसाठी वेकोलि प्रशासनाने त्रास दिला. त्याच नैराश्‍यातून तिने आत्महत्या केली, असा आरोप वडिलांनी केला. आशा तुळशीराम घटे (रा. सास्ती) असे मृताचे नाव आहे. वेकोलिच्या महाप्रबंधक कार्यालयासमोर मृतदेह ठेवून संबंधित अधिकाऱ्यांवर कारवाई करावी, अशी मागणी कुटुंबीयांनी केली.

राजुरा तालुक्‍यातील साखरी येथील तुळशीराम घटे यांची शेतजमीन वेकोलिच्या बल्लारपूर क्षेत्राअंतर्गत येणाऱ्या पोवनी-३ कोळसा खाणीसाठी अधिग्रहित करण्यात आली. तुळशीराम घटे यांच्या कुटुंबात पत्नी, दोन मुली आणि एक मुलगा आहे. वेकोलित शेतजमीन गेल्यामुळे मोलमजुरी करून ते उदरनिर्वाह करीत होते. शेतजमिनीच्या अधिग्रहणाचा मोबदला मिळाला. मात्र, नोकरीसाठी अनेक दिवसांपासून वेकोलि प्रशासन विविध कागदपत्रांसाठी तगादा लावून त्रास देत होते.

जाणून घ्या - घनदाट जंगलात अजूनही उभा आहे अष्टकोनी वाडा, २०० एकर जमीनदारी असलेला परिवार एका रात्रीत झाला होता गरीब

वडिलांचे वय जास्त असल्याने मुलीला नोकरी देण्यासाठी आवश्‍यक कागदपत्र वेकोलि प्रशासनाकडे सादर केली. परंतु, नोकरी देण्यास टाळाटाळ केली जात होती. दरम्यान, २२ मार्च रोजी वेकोलिचे क्षेत्रीय योजना अधिकारी जी. पुलीया यांनी घटे कुटुंबीयांना कागदपत्रांच्या पूर्ततेसाठी कार्यालयात बोलविले. संपूर्ण कुटुंब कार्यालयात गेले असता कागदपत्रांच्या पूर्ततेसंबंधी विचारणा करण्यापेक्षा कुटुंबातील वैयक्तिक प्रश्नावरून मुलीला विचारणा करून अनावश्‍यक त्रास दिला. अपमानास्पद वागणूक देऊन घरी परत पाठविले.

वेकोलि प्रशासनाच्या अशा कारणामुळे कुटुंबाला मोठा मानसिक त्रास सुरू होता. यातच मुलीने विष प्राशन करून आत्महत्या करण्याचा प्रयत्न केला. २३ मार्चला मुलीची प्रकृती बिघडल्याने स्थानिक रुग्णालयात उपचार केले. परंतु, प्रकृतीत सुधारणा न झाल्यामुळे २७ मार्च रोजी चंद्रपूर येथे उपचारार्थ दाखल केले.

अधिक माहितीसाठी - तुमच्या मुलाला वारंवार तहान लागत तर नाही ना? उत्तर हो असेल तर व्हा सावधान, असू शकतो हा आजार

मात्र, बुधवारी तिचा मृत्यू झाला. आत्महत्येला वेकोलि प्रशासन जबाबदार असल्याचा आरोप करीत कुटुंबीयांनी मुलीचा मृतदेह वेकोलिच्या बल्लारपूर क्षेत्राच्या महाप्रबंधक कार्यालयासमोर आणून ठेवला. क्षेत्रीय योजना अधिकारी जी. पुलीया हेच मृत्यूस जबाबदार असून त्यांच्यावर कारवाई करण्याची मागणी केली आहे.