फिरायला जाणे जीवावर बेतले, डोहात बुडून तिघांचा मृत्यू

चिखलदरा ( अमरावती) : चिखलदरा (chikhaldara tourism) पर्यटन स्थळावर फिरायला आलेल्या अकोला येथील दोन पर्यटकांचा जत्राडोहच्या डोहात बुडून मृत्यू झाला. रविवारी दुपारी ३. ३० वाजता ही घटना घडली. दोघांचे मृतदेह डोहाबाहेर काढून शवविच्छेदनासाठी ग्रामीण रुग्णालयात पोलिसांनी पाठविण्यात आले आहे. दुसऱ्या एका घटनेत खटकाली येथील डोहात आंघोळीसाठी उतरलेल्या व्यक्तीचा मृत्यू झाला.

शेख इकरम शेख हुसेन कुरेशी २६ व शेख आजीम शेख सकुर २७ अकोट फैल अकोला, अशी मृतांची नावे असल्याचे पोलिसांनी सांगितले. दोघेही ९ मित्रांसोबत चारचाकी वाहनाने चिखलदरा येथे गेले होते. चिखलदरा पर्यटन स्थळावरील विविध स्थळांना भेट दिल्यानंतर, सर्व मित्र मेळघाट व्याघ्र प्रकल्पाच्या मेळघाट वन्यजीव विभागाअंतर्गत जत्राडोह पॉईंट आहे. त्याठिकाणी गेले. येथे कोसळणाऱ्या धबधब्याखाली डोहात उतरण्यास सक्त मनाई आहे. तरीसुद्धा ते पाण्यात उतरले. दरम्यान, दोघे खोल पाण्यात उतरल्याने बुडाले. पुढील तपास ठाणेदार राहुल वाढवे यांच्या मार्गदर्शनाखाली एएसआय सुरेश राठोड, सुधीर पोटे, आशिष वरघट, रितेश देशमुख करीत आहे. दोघांचे मृतदेह शवविच्छेदनासाठी चिखलदरा ग्रामीण रुग्णालयात आणण्यात आले होते.

खटकाली डोहात एकाचा मृत्यू-

दुसऱ्या एका घटनेत चिखलदरा पोलिस स्टेशन अंतर्गत येणाऱ्या पोपटखेडा खटकाली मार्गावरील पीर बाबा नदीच्या डोहात एका व्यक्तीचा बुडून मृत्यू झाला. हरीश जानराव काळमेघ (३८ रा चौसाळा तालुका अंजनगाव), असे मृताचे नाव आहे. शनिवारी आंघोळीसाठी डोहात उतरले असता बुडून मृत्यू झाला. त्यांचा मृतदेह रविवारी काढण्यात आला. पुढील तपास ठाणेदार राहुल वाढवे यांच्या मार्गदर्शनाखाली जमादार अविनाश देशमुख, प्रभाकर चव्हाण, रायबा जावरकर करीत आहे.