दुर्दैव! शेततळ्यात अंघोळ करणे मुलांना भोवले, दोघांचा बुडून मृत्यू

अमरावती : अंघोळीकरिता गेलेल्या दोन मुलांचा शेततळ्यात बुडून मृत्यू झाला. शनिवारी (ता. २६) सायंकाळी पावणेपाचच्या सुमारास ही घटना उघडकीस आली. सकाळी नऊपासून हे दोघे घरून गेले होते. तन्मय मारोती भुरे (वय ९) व आर्यन दिलीप टेटू (वय ८, दोघेही रा. अंजनगावबारी) अशी मृत मुलांची नावे असल्याचे पोलिस निरीक्षक पंजाब वंजारी यांनी सांगितले.

तन्मय व आर्यन हे दोघेही घरी आईवडिलांना न सांगता अंघोळ करण्यासाठी सकाळीच नऊच्या सुमारास गावालगतच्या स्मशानभूमीजवळ असलेल्या शेततळ्यात गेले. दोघांनाही पोहता येत नव्हते. परंतु पाण्यात जाण्याचा मोह त्यांना आवरता आला नाही. शिवाय घटनेच्या वेळी त्याठिकाणी दोघांव्यक्तीरिक्त त्यांना टोकणारे कुणीच नव्हते.

तलावाच्या काठावर कपडे

तलावाच्या काठावर कपडे काढल्यावर ते दोघेही पाण्यात उतरले. पावसाळ्यामुळे शेततळ्यात बऱ्यापैकी पाणी साचलेले आहे. दोघांनाही पाण्याच्या खोलीचा अंदाज आला नाही. त्यामुळे एकापाठोपाठ दोघांचाही बुडून मृत्यू झाला. ते दोघेही इयत्ता तिसरीमध्ये शिकत होते, असेही पोलिसांनी सांगितले.

हेही वाचा : धक्कादायक प्रकार! चक्क मृताचे मारले अंगठे; खात्यातून तब्बल १ लाख ३० हजार हडपले

पालकांची शोधमोहीम

सायंकाळपर्यंत मुले घरी परत आले नाही. त्यामुळे तन्मय व आर्यन यांच्या पालकांनी शोधमोहीम सुरू केली. शेततळ्याजवळ काही जण पोहोचले तेव्हा दोघांचे कपडे काठावर आढळल्याने दोघांचा बुडून मृत्यू झाल्याचे समजले. बडनेरा पोलिसांना सायंकाळी पावणेपाचच्या सुमारास घटनेची माहिती दिली. पोलिसांनी ग्रामस्थांच्या मदतीने आर्यन व तन्मय या दोघांचेही मृतदेह बाहेर काढले. बडनेरा पोलिसांनी अकस्मात मृत्यू अशी नोंद घेतली.

जाणून घ्या  : आजारातून बरे होण्याची संपूर्ण यंत्रणा आपल्या शरीरातच! जाणून घ्या कोविड रुग्णांसाठी प्राणायाम

दोन दिवसात दुसरी घटना

अंजनगावसुर्जी तालुक्‍यात खोडगाव येथे शुक्रवारी (ता. २५) दोन चुलत भावांचा नदीपात्रात बुडून मृत्यू झाला होता. त्यानंतर शनिवारी अंजनगावबारीत दोघे चिमुकले दगावल्याची घटना घडली.

(संपादन : दुलिराम रहांगडाले)