अमरावतीवरून येत होते वाळूमाफिये दोन देशी कट्टे घेऊन, मात्र पुलगावात अडकले पोलिसांच्या जाळ्यात

 पुलगाव (जि. वर्धा) : वाळूमाफियांचे प्रस्थ असलेल्या पुलगावात देशीकट्टा वापरणाऱ्या दोन वाळूमाफियांना पुलगाव पोलिसांनी अटक केली. त्यांच्याजवळून दोन देशीकट्ट्यासह ११ जिवंत काडतूस जप्त करण्यात आले. ही कारवाई सोमवारी (ता. १९) दुपारच्या सुमारास येथील राममंदिर परिसरात करण्यात आली आहे. त्यामुळे या कारवाईने अनेकांचे धाबे दणाणले आहे.

गणेश रमेश येदबान (वय ४३) आणि अविनाश गणेश खोडे (वय ३०) दोन्ही रा. वाल्मीकनगर, पंचधरा रोड, पुलगाव अशी आरोपींची नावे असल्याची माहिती पोलिसांकडून देण्यात आली आहे. हे दोघे अमरावती येथून पुलगाव येथे येत असताना पोलिसांनी त्यांना ताब्यात घेतल्याचे सांगण्यात आले.

अवश्य वाचा :  सख्या भावानेच केला भावाचा खून; कारण, जागा विकण्यावरून सुरू होता वाद

पुलगावात घेतले ताब्यात
 
पोलिसांनी दिलेल्या माहितीनुसार, अमरावती येथून एमएच ४० यू ९६३८ क्रमांकाच्या दुचाकीने येत असलेल्या दोन युवकांजवळ देशी कट्टे आणि जिवंत काडतूस असल्याची माहिती पुलगाव पोलिसांना मिळाली होती. यावरून पोलिसांनी सापळा रचून या क्रमांकाच्या दुचाकीवरील दोघांना ताब्यात घेत विचारपूस केली. त्यांची नावे गणेश येदबान आणि अविनाश खोडे, असे असल्याचे त्यांनी सांगितले.

जाणून घ्या : वर्ध्यात लागला आयपीएलवर सट्टा; पोलिसांनी कारवाई करत एकाला केली अटक

दोघांकडे नव्हता शस्त्र बाळगण्याचा परवाना

त्यांची झडती घेतली असता त्यांच्याकडून दोन देशीकट्टे व काडतूस जप्त करण्यात आले. या दोघांना या शस्त्राच्या परवान्याबाबत विचारणा केली असता त्यांच्याकडून कुठलाही पुरावा नसल्याने त्यांच्यावर हत्यार कायद्यान्वये गुन्हा दाखल करण्यात आला आहे. ही कारवाई पोलिस अधीक्षक प्रशांत होळकर यांच्या मार्गदर्शनात उपविभागीय पोलिस अधिकारी तृप्ती जाधव, ठाणेदार रवींद्र गायकवाड यांच्या मार्गदर्शनात पोलिस उपनिरीक्षक अमोल कोल्हे, हवालदार राजेंद्र हाडके, खुशाल राठोड, बाबुलाल पंधरे, पंकज टाकोने, स्वप्नील जीवने, शरद सानप, जयदीप जाधव, मुकेश वांदिले, प्रदीप साहाकाटे यांनी केली आहे.

(संपादन : दुलिराम रहांगडाले)