Amravati Rain : अवकाळीचा धारणी, चिखलदरा तालुक्यास फटका; पावसामुळे मक्याचे पीक झोपले

अमरावती - गेल्या चोवीस तासांत झालेल्या अवकाळी पावसाचा सर्वाधिक फटका मेळघाटातील धारणी व चिखलदरा तालुक्यास बसला. या दोन्ही तालुक्यात २२७८ हेक्टर क्षेत्रातील चणा व गव्हाचे अतोनात नुकसान झाले असून जिल्हा प्रशासनाने नुकसानग्रस्त भागाचे पंचनामे करण्याचे आदेश संबंधित यंत्रणांना दिले आहेत.

गेल्या चोवीस तासांत जिल्ह्यात सरासरी जिल्ह्यात ६.१ मिमी पाऊस झाला. जिल्ह्यातील धारणी, चिखलदरा व नांदगाव खंडेश्वर या तालुक्यात तुलनेने अवकाळीचे प्रमाण अधिक आहे. धारणी तालुक्यात सरासरी २५ मिमी चिखलदरा तालुक्यात १६.१, नांदगाव खंडेश्वरमध्ये १९.८ मिमी पाऊस झाला. या पावसाने सर्वाधिक नुकसान धारणी व चिखलदरा तालुक्यात झाले आहे.

धारणी तालुक्यातील २१४९ व चिखलदरा तालुक्यातील १२९, अशा एकूण २२७८ हेक्टरमधील चणा व गव्हाचे नुकसान झाले असल्याचा प्राथमिक अहवाल जिल्हा प्रशासनाने दिला आहे. फेब्रुवारी महिन्यातील ही दुसरी वेळ असून यापूर्वी ११ फेब्रुवारीस अवकाळी पावसाने हजेरी लावली होती.