अहमदनगर : उड्डाणपुलाचे सुशोभीकरण सुरू होणार

अहमदनगर: श्री छत्रपती शिवाजी महाराजांच्या राज्याभिषेक सोहळा दिनानिमित्त येथील उड्डाणपुलाच्या शिवचरित्र चित्रिकरणाचा प्रारंभ उद्या (ता. ६) होत आहे. खासदार डॉ. सुजय विखे पाटील व आमदार संग्राम जगताप यांच्या प्रमुख उपस्थितीत हा कार्यक्रम होणार आहे.

येथील मार्केट यार्ड चौकात सकाळी नऊ वाजता होणाऱ्या या कार्यक्रमास नगरसेवक, पक्षीय पदाधिकारी तसेच मान्यवर उपस्थित राहणार आहेत. शहरातील उड्डाणपूल ही शहराची शान असणार आहे. त्यात अधिक सौंदर्याची भर घालण्यासाठी पुलावर सुंदर रंगकाम करण्यात येणार आहे.

या उपक्रमांतर्गंत शिवचरित्र रेखाटण्याचे नियोजन केले आहे. पुलाचे उद्घाटन होण्यापूर्वी हे काम होणार आहे. त्यामुळे हा पूल पर्यटकीय दृष्ट्या महत्त्वाचा ठरणार आहे. केवळ शिवचरित्रच नव्हे, तर आकर्षक वृक्ष तयार करण्यात येणार आहेत. ॲम्पी थिएटर, फुलांची आकर्षक झाडे लावून सुंदर रोषणाई करण्यात येईल. तसेच आवश्यक तेथे रंगीत कारंजे करण्याचे नियोजन आहे. यासाठी खासदार डॉ. विखे व आमदार जगताप यांची संकल्पना आहे.

६५ पिलर्सचे सुशोभीकरण

उड्डाणपुलासाठी ६५ पिलर्स आहेत. १९ रॅम्प आहेत. ९३१ सिग्मेंट आहेत. पुलाची लांबी तीन हजार ८० मीटर म्हणजेच तीन किलोमीटर आहे. डिसेंबर २०२० मध्ये पुलाच काम सुरू झालेे आहे. ते डिसेंबर २०२२ पर्यंत संपेल. जिल्ह्यातून येणाऱ्या ग्रामस्थांना या पुलाबाबत उत्सुकता वाटते. बाहेरील जिल्ह्यातून येणारे लोक हे भव्य-दिव्य काम थांबून पाहत आहेत. या पुलामुळे नगरला मोठ्या शहराचा लूक येत आहे. त्यात आता शिवचरित्रांतील विविध चित्रांची भर पडणार आहे.

पुलामुळे शहराच्या वैभवात भर पडणार आहे. पुलाच्या पिलर्सवर शिवचरित्रांतील विविध प्रसंग रेखाटण्यात येणार आहेत. त्यामुळे हा पूल पर्यटकांचे आकर्षण ठरेल. नगर शहरात भूईकोट किल्ला, जवळील चांदबीबी महाल तसेच उड्डाणपूल असे पर्यटकांचे आकर्षण असेल.

- संग्राम जगताप, आमदार