Ahmednagar : विजेचा खांब अंगावर कोसळल्याने शेतात काम करणाऱ्या महिलेचा मृत्यू; परिसरात हळहळ

अकोले : अंगावर विजेचा खांब कोसळल्याने अकोले तालुक्यातील गणोरे ) येथील अलका नामदेव आंबरे (वय 55) यांचा जागीच दुदैवी मृत्यू झाला असल्याची घटना आज सोमवारी साडे चार वाजेच्या सुमारास घडली.

तालुक्यातील गणोरे परिसरातील शिंदेवाडी परिसरात आज लाईट शट डाऊन असल्यामुळे बाभळीचे झाड तोडण्याचे काम सुरू होते. मात्र यावेळी बाभळीच्या झाडाची फांदी शेजारी असलेल्या वीज वाहक तारांवर कोसळली. तारांवर झाडाची फांदी कोसळल्यामुळे तारांना आणि विजेच्या खांबांना मोठा हादरा बसला. त्यामुळे एका लाईनमधील तीन पोल हे एकाच वेळी कोसळले.

अलका आंबरे या याचवेळी आपल्या शेतात काम करीत होत्या. त्यांच्याजवळ देखील एक विजेचा खांब उभा होता. हा पोल थेट अलका आंबरे यांच्या अंगावर कोसळला. पोलचा अंगावर कोसळण्याचा वेग जास्त असल्याने त्यांना जबरदस्त मार लागला. त्यामुळे त्यांचा जागीच मृत्य झाला.

विजेचा खांब कोसळल्याचा मोठा आवाज झाल्याने स्थानिकांनी घटनास्थळी धाव घेतली व तात्काळ त्यांना अकोले ग्रामीण रुग्णालयात दाखल केले. मात्र वैद्यकीय अधिकार्‍यांनी त्यांना मयत घोषित केले. अलका आंबरे यांच्या मृत्यूची बातमी समजताच त्यांच्या नातेवाईकांनी एकच टाहो फोडला. त्यांच्या मृत्यूमुळे परिसरात हळहळ व्यक्त कऱण्यात येत आहे.

रात्री 10 वाजता गणोरे याठिकाणी त्यांच्यावर अंत्यसंस्कार करण्यात आले. अकोले पंचायत समितीचे माजी सदस्य संत नामदेव आंबरे यांच्या त्या पत्नी होत्या. या अपघाताची माहिती मिळताच नातेवाईकांनी अकोले ग्रामीण रुग्णालयात मोठी गर्दी केली आहे .