Ahmednagar : संभाजी महाराजांच्या मिरवणुकीवर दगडफेक! बोधेगावात कडकडीत बंद

बोधेगाव : शेवगाव हे पुरोगामी विचारांचे शहर आहे. या ठिकाणची परंपरा एकमेकांना समजून घेण्याची असताना, शांततामय वातावरणात निघालेल्या संभाजी महाराजांच्या जयंतीनिमित्तच्या मिरवणुकीवर भ्याड हल्ला झाला. या पार्श्वभूमीवर बोधेगाव (ता. शेवगाव) येथे सर्व व्यापारी व ग्रामस्थांच्या वतीने शुक्रवारी (ता. १९) कडकडीत बंद पाळत निषेध व्यक्त करण्यात आला.

शेवगाव येथे रविवारी (ता. १४) रोजी छत्रपती संभाजी महाराजांच्या जयंतीनिमित्त निघालेल्या शांततामय मिरवणुकीवर काही समाजकंटकांनी हल्ला करून जातीय तेढ निर्माण केली. ज्यांचा काहीच संबंध नाही, अशा छोट्या-मोठ्या दुकानांवर, तसेच दुचाकी- तीनचाकी, चार चारचाकी वाहनांवर दगडफेक करून मोठे नुकसान करण्यात आल्याने, शेवगावातील व्यावसायिकांनी ४ दिवस बंद पाळत, आरोपींना अटक करून कारवाईची मागणी केली होती.

त्यानुसार ११२ पैकी ४५ आरोपींना गजाआड केल्यानंतर उर्वरितांवर कारवाई आणि अवैध व्यवसाय बंद करण्याच्या प्रशासनाच्या लेखी आश्वासनानंतर बंद मागे घेण्यात आला. घटनेच्या निषेधार्थ सकाळी सहापासून सायंकाळी सहापर्यंत बोधेगाव, तसेच बालमटाकळीतही कडकडीत बंद पाण्यात आला होता.

यावेळी समाजकंटक आणि त्यांना साथ देणाऱ्यांना पकडून त्यांच्यावर कायदेशीर कारवाई करण्यात यावी, याकरिता बोधेगाव पोलिस दूरक्षेत्राचे नानासाहेब गर्जे, पोलिस नाईक संतोष धोत्रे यांना बोधेगावातील सकल हिंदू समाजातर्फे निवेदन देण्यात आले.