ही बँक जिल्हा परिषदेला देणार टक्केवारी 

नगर : जिल्हा प्राथमिक शिक्षक बॅंकेतील सभासदांच्या कर्जाची वसुली जिल्हा परिषदेमार्फत होत आहे. त्यातून जिल्हा परिषदेला काही रक्कम मिळावी, अशी मागणी शिक्षण समितीतर्फे करण्यात आली होती. त्यानुसार कर्जाची वसुली बंद करण्यात आली होती. मात्र, आता जिल्हा परिषदेचे उपाध्यक्ष तथा शिक्षण समितीचे सभापती व प्राथमिक शिक्षक बॅंकेच्या पदाधिकाऱ्यांची चर्चा झाली अाहे. बॅंकेच्या निव्वळ नफ्यातील एक टक्का रक्कम जिल्हा परिषदेच्या शैक्षणिक कार्यक्रमासाठी खर्च करण्याचा करार करण्यात येत आहे. हा करार अंतिम टप्प्यात आला आहे. 

अवश्य वाचा ः  कुकडीच्या आवर्तनाबाबत फसवाफसवी ः राम शिंदेचा रोहित पवारांवर आरोप

जिल्हा परिषदेकडून प्राथमिक शिक्षकांना देण्यात येणाऱ्या पगारातून प्राथमिक शिक्षक बॅंकेच्या कर्जाची वसुली केली जात आहे. या वसुलीसाठी शिक्षक बॅंकेला कुठलाही खर्च येत नसून, त्यांची कर्जवसुली शंभर टक्के होत आहे. त्यामुळे बॅंकेकडून कर्जाच्या वसुलीपोटी जिल्हा परिषदेने रक्कम घ्यावी, अशी मागणी शिक्षण समितीच्या सभेत सदस्यांनी केली होती.

 हेही वाचा ः  एचआयव्हीग्रस्तांना घरपोच औषधोपचार 

त्यावर ही कर्जवसुली थांबविण्याचा निर्णय समितीने घेतला आहे. त्यावरून बॅंक व सदस्य यांच्यात तिढा निर्माण झाला होता. यातून आता बॅंकेच्या पदाधिकाऱ्यांनी मार्ग काढला असून, बॅंकेला होणाऱ्या निव्वळ नफ्यातून एक टक्का रक्‍कम जिल्हा परिषदेमार्फत विद्यार्थी व शिक्षक यांच्यासाठी होणाऱ्या कार्यक्रमावर खर्च करण्याची तयारी दर्शविली आहे.

तसा करार आता बॅंकेकडून जिल्हा परिषदेशी करण्यात येणार असून, त्याबाबतचा प्रस्ताव तयार करून त्यांनी प्रशासनाला सादर केलेला आहे. त्यावर आता प्रशासन काय निर्णय घेते, याकडे सर्वांचे लक्ष लागले आहे. 

शैक्षणिक उपक्रमासाठी खर्च करणार ः दुसुंगे

रिझर्व्ह बॅंकेच्या नियमानुसार, कुठलीही संस्था नफ्याच्या एक टक्का रक्कम धर्मादाय निधी म्हणून खर्च करू शकते. त्यामुळे प्राथमिक शिक्षक बॅंकेने निव्वळ नफ्याच्या एक टक्का रक्‍कम जिल्हा परिषदेने सुचविलेल्या विद्यार्थी व शिक्षकांच्या उपक्रमासाठी खर्च करण्याची तयारी दाखविली आहे. 
- संतोष दुसंगे, अध्यक्ष, प्राथमिक शिक्षक बॅंक 

शिक्षण समित्याच्या सदस्यांशी चर्चा करणार ः शेळके

बॅंकेकडून निव्वळ नफ्यातून जिल्हा परिषदेतर्फे होणाऱ्या शैक्षणिक कार्यक्रमासाठी एक टक्का रक्कम देण्याची तयारी दर्शविली आहे. याबाबत शिक्षण समितीच्या सदस्यांशी चर्चा करून निर्णय घेण्यात येईल. 
- प्रताप शेळके, उपाध्यक्ष तथा शिक्षण समिती सदस्य, जिल्हा परिषद