लाच घेताना महसूल सहायक सापळ्यात

अहमदनगर - अकृषक परवानगीसाठी ना हरकत प्रमाणपत्र देण्यासाठी दोघांकडून चार हजार रुपयांची लाच घेताना जिल्हाधिकारी कार्यालयातील भूसंपादन विभागातील महसूल सहायकास रंगेहाथ पकडले. मंगेश विजय ढुमणे (वय ४१, रा. गणेश चौक, सिव्हिल हडको, अहमदनगर) असे पकडलेल्या महसूल सहायक आरोपीचे नाव आहे. लाचलुचपत प्रतिबंधक विभागाच्या पथकाने सोमवारी (ता. ४) दुपारी जिल्हाधिकारी कार्यालय परिसरात ही कारवाई केली.

वडझिरे (पारनेर) येथील तक्रारदाराने त्यांच्या गावामध्ये आईच्या नावे घेतलेल्या जमिनीच्या अकृषक परवानगीसाठी ना हरकत प्रमाणपत्र मिळण्यासाठी जिल्हाधिकारी कार्यालयातील भूसंपादन विभागाकडे प्रकरण दाखल केले होते. ना हरकत प्रमाणपत्र दिले म्हणून ढुमणे याने तक्रारदाराकडे तीन हजार रुपयांची मागणी केली. तक्रारदार यांचे निघोज (ता. पारनेर) गावातील मित्र यांनीसुद्धा अकृषक परवानगीसाठी ना हरकत प्रमाणपत्र मिळण्यासाठी प्रकरण दाखल केले होते.

ते प्रमाणपत्र देण्यासाठी ढुमणे यांनी तीन हजार रुपये लाचेची मागणी केल्याची तक्रार लाचलुचपत प्रतिबंधक विभागाकडे केली होती. या तक्रारीवरून लाचलुचपत विभागाने एक जुलै रोजी लाचमागणीची पडताळणी केली. ढुमणे यांनी पंचासमक्ष दोन्ही कामांचे एकत्रित मिळून चार हजार रुपये पंचासमक्ष मागितल्याचे निष्पन्न झाले.

सोमवारी (ता. ४) ढुमणेविरोधात सापळा लावला होता. जिल्हाधिकारी कार्यालय परिसरातील भूसंपादन विभागाच्या समोरील मोकळ्या व्हरांड्यात ढुमणे याला तक्रारदाराकडून लाचेची रक्कम स्वीकारताना रंगेहाथ पकडले. पोलिस उपअधीक्षक हरीश खेडकर, पोलिस निरीक्षक शरद गोर्डे, पोलिस निरीक्षक गाहिनीनाथ गमे, पोलिस अंमलदार रमेश चौधरी, विजय गांगूल, रवींद्र निमसे, राधा खेमनर, संध्या म्हस्के, हरूण शेख, राहुल डोळसे यांच्या पथकाने ही कारवाई केली.