पुण्यात कुटुंबाला भेटायला गेलेले नायब तहसीलदार बाधित

संगमनेर : कुटुंबाला भेटण्यासाठी पुण्याला गेलेले संगमनेर तहसील कार्यालयातील नायब तहसीलदार कोरोनाच्या तडाख्यात सापडले आहेत. प्रशासकीय अधिकाऱ्याला लागण होण्याच्या पहिल्याच घटनेने जिल्ह्यात खळबळ उडाली आहे. 

हेही वाचा - रयतच्या निवडणुकीकडे लागले लक्ष, नगरमध्ये आहे यांची चर्चा

संगमनेरच्या तहसील कार्यालयात सध्याच्या कोरोनाच्या लढ्यात महत्त्वाची जबाबदारी सांभाळणारे एक नायब तहसीलदार गेल्या रविवारी आपल्या कुटुंबीयांना भेटण्यासाठी पुण्याला गेले होते. मात्र, तेथे त्यांना कोरोनाची लागण झाली. भेटीनंतर ते संगमनेरात परतले होते. रविवारी ( ता. 7) श्‍वसनाचा त्रास जाणवू लागल्याने त्यांना तातडीने रुग्णवाहिकेतून पुण्याला हलविण्यात आले. तेथे त्यांचा स्राव घेऊन तपासणी केली असता त्याचा अहवाल पॉझिटिव्ह आला.

संगमनेरातील कोरोना लढ्यात त्यांच्यावर परजिल्ह्यात जाण्यासाठी परवाना देण्याची महत्त्वाची जबाबदारी होती. त्यामुळे दररोज त्यांचा अनेक लोकांशी, तसेच कार्यालयातील सर्वांशीच संपर्क होता. मात्र, गेल्या चार ते पाच दिवसांपासून ते कार्यालयात नसल्याने, बाधा झाल्यानंतर ते नेमके कोणाच्या संपर्कात आले याचा शोध घेतला जात असल्याची माहिती तहसीलदार अमोल निकम यांनी दिली.