दारूची नशा पडली महागात; अखेर खाल्ली जेलची हवा..!

राहुरी (जि.अहमदनगर) : दोन महाभाग फुल्ल टल्ली झाले. नशेत पोलीस ठाण्यात शिरले. ठाणे अंमलदारांच्या दालनात मोक्कार आरडाओरड करुन, अवघे पोलीस ठाणे डोक्यावर घेतले. पण त्यांची नशा खाडकन उतरली. गयावया सुरु झाल्या. पण उशीर झाला होता. कारण दारुच्या नशेने केव्हाच घात केला होता.....

नाहीतर विषारी औषध पिऊ....

तुकाराम रामकृष्ण राजदेव (वय ३५), संदीप नामदेव राजदेव (वय ३०, दोघेही रा. ब्राम्हणी) अशी अटक केलेल्या दारुड्यांची नावे आहेत. दोघेही चुलत भाऊ. दोघांनी भरपूर दारु ढोसली. नशेचा अंमल चढला. तशी त्यांच्या अंगात वीरश्री चढली. स्वतःच्या पायावर नीट उभे राहता येईना. तरी, त्यांनी धीटाईने राहुरी पोलीस ठाणे गाठले. बुधवारी (ता.११) रात्री सव्वा सात वाजता दोघांनी ठाणे अमलदारांसमोर आमची तक्रार घ्या. असा आग्रह धरला. तक्रार काय आहे. असे विचारल्यावर त्यांनी "आम्ही दारू पिऊन पडलो. आमची तक्रार नोंदवा." असा घोशा लावला. "कुणा विरुद्ध तक्रार द्यायची." असे ठाणे अंमलदारांनी विचारल्यावर "ते आम्हाला माहिती नाही. तुमची तक्रार नोंदवा. नाहीतर विषारी औषध पिऊ." अशी दमबाजी सुरू केली. पोलीस विनवण्या करून, त्यांना निघून जाण्यास सांगू लागले. तसा त्यांचा पारा चढला. आवाज वाढला. आरडाओरड करुन, त्यांनी पोलिस ठाणे डोक्यावर घेतले.

एवढ्यात, पोलिस निरीक्षक नंदकुमार दुधाळ पोलीस ठाण्यात दाखल झाले. आरडाओरड ऐकून दोघांना केबिनमध्ये बोलविले. त्यांचा अवतार पाहून समजायचे ते समजले. दोघांची उचलबांगडी करून, वैद्यकीय तपासणी करण्याचे आदेश दिले. राहुरीच्या ग्रामीण रुग्णालयात वैद्यकीय तपासणीला आल्यावर त्यांची नशा उतरली. त्यांनी पोलिसांना गयावया केली. परंतु, तोपर्यंत उशीर झाला होता. वैद्यकीय अधिकार्‍यांचा दाखला घेऊन, पोलीस कॉन्स्टेबल महेंद्र गुंजाळ यांनी राहुरी पोलीस ठाण्यात महाराष्ट्र दारूबंदी कायद्यान्वये गुन्हा दाखल केला. अखेर दोघांना दारूच्या नशेमुळे जेलची हवा खावी लागली