मिलिटरीच्या सेवेतून रजेवर आला नि डायरेक्ट चोरच झाला..

नगर : 

तो भारतीय सैन्यात होता. रजा काढून घरी आला नि इथेच रमला. सुट्टीच्या काळात तो वेगळ्या उद्योगात गुंतला. तो उद्योग म्हणजे चोरीचा, लोकांना फसवणुकीचा. अहमदनगर शहरासह राज्यात त्याचा हा धंदा सुरू होता. मात्र, त्याचा हा गोरखधंदा उघडकीस आला.

कर्मचाऱ्याला स्थानिक गुन्हे शाखा व मिलिटरी इंटेलिजन्स पथकाने नगर एमआयडीसी परिसरातून आज ताब्यात घेतले. प्रशांत भाऊराव पाटील (वय 32, रा. रवळनाथ रोड, कुकतागिरी, खानापूर, बेळगाव) असे त्याचे नाव आहे. 

हेही वाचा कोपर्डीच्या पुरावृत्तीची चर्चा... डोणगावातील मुलीच्या मृत्यूचे गूढ वाढले 

पोलिस अधीक्षक अखिलेश कुमार सिंह यांना जम्मू-काश्‍मीर येथील मिलिटरी इंटेलिजन्स पथकाकडून माहिती मिळाली, की एमआयडीसी परिसरातील दत्तनगर, डेअरी चौक, पाण्याच्या टाकीजवळ रो-हौसिंगमध्ये एक व्यक्ती सैन्य दलात नोकरीस नसतानाही सैन्य दलाचा गणवेष घालून व स्वत:च्या चारचाकी वाहनावर "ऑन आर्मी ड्यूटी' असा बोर्ड लावून संशयितरीत्या फिरत आहे. त्यानुसार स्थानिक गुन्हे अन्वेषण शाखेच्या पोलिसांनी सापळा लावून त्याला अटक केली. त्याच्याकडे विचारपूस केली असता त्याने प्रशांत पाटील असे नाव सांगितले. 

त्याची झडती घेतली असता सैन्य दलाचे बनावट ओळखपत्र, दोन गणवेश, गणवेशावर लावण्याचे चिन्ह, फीत, गोल शिक्का, स्टॅम्प पॅड, नेम प्लेट, आर्मीचे कॅंटीन कार्ड, वडील व पत्नीच्या नावाचे डिपेन्डिंग कार्ड, पाच वेगवेगळ्या बॅंकांचे एटीएम कार्ड, पेन्शन सिस्टिम कार्ड, पॅन कार्ड, आधार कार्ड, आर्मीचे नोकरीसाठी वेगवेगळ्या लोकांकडून भरून घेण्यात आलेले अर्ज, पत्नीच्या नावाचे चौदा पासबुक, वेगवेगळ्या बॅंकेचे सात चेकबुक, एक चारचाकी वाहन, बनावट नंबर प्लेट, पाच मोबाईल आणि आसाम रायफल ट्रेनिंग सेंटर स्कूल यांच्याकडील मेजर ए. के. नायर यांच्या सहीचे परसराम भाऊराव पाटील या नावाचे प्रोव्हिजनल अपॉइंटमेंट लेटर, अशी बनावट कागदपत्रे व सात लाख 22 हजार रुपयांचा मुद्देमाल जप्त केला. 

आवश्‍य वाचा बघा बया, पवारसाहेबांचा नातू रिक्षा चालवतोय! 

दरम्यान, प्रशांत पाटील आसाम रायफलमध्ये नोकरीस असताना 2014 मध्ये रजेवर आल्यानंतर पुन्हा हजर झाला नाही. त्यामुळे त्यास नोकरीवरून बडतर्फ करण्यात आले. त्यानंतर तो गणवेश व अन्य साहित्याचा वापर करून फसवणूक करीत होता.

या बाबत पोलिस कर्मचारी संदीप पवार यांच्या फिर्यादीवरून एमआयडीसी पोलिस ठाण्यात गुन्हा दाखल करण्यात आला आहे. या संशयित आरोपीवर यापूर्वी बंडगार्डन, पुणे, वाकड येथे फसवणुकीचे गुन्हे दाखल आहेत.